Buxheti i shtetit po mbledh më shumë të ardhura nga taksa e cila lidhet drejtpërsëdrejti me nivelin e konsumit nga ana e qytetarëve shqiptarë, për produkte të shportës por jo vetëm. Të dhënat zyrtare të Ministrisë së Financave tregojnë se të ardhurat bruto nga Tatimi mbi Vlerën e Shtuar në 5 mujor janë regjistruar në nivelin 96.2 miliardë lekëve me një rritje prej 11.6 miliardë lekësh në raport me një vit më parë.
Dhe pavarësisht se rimbursimet e dhëna nga buxheti për TVSH-në janë rritur me 3.7 miliardë lekë gjatë kësaj periudhe, sërish të ardhurat neto nga TVSH-ja rezultojnë 8.1 miliardë lekë apo 81 milionë euro më të larta se e njëjta periudhë e një viti më parë.
Rritje ka shënuar edhe TVSH-ja e mbledhur në import, pavarësisht kursit të këmbimit, çka tregon kërkesën në rritje të qytetarëve për produkte ushqimore dhe jo ushqimore, por peshën më të rëndësishme e zë TVSH-ja që xhirohet në vend dhe mblidhet nga shitjet e produkteve të ndryshme.
Të ardhurat nga TVSH së arkëtuar (neto) brenda vendit, administruar nga tatimet, u realizua në masën 23.2 miliardë lekë, 4.5 miliardë lekë ose 24.2% më shumë se 5-mujori 2023.
Ajo që vihet nga të dhënat e përpunuara nga ScanTv, është që nëse marrim në analizë të njëjtën periudhë në 5 vitet e fundit, rritja është progresive dhe 2024 -ta shënon rekord në të hyrat nga TVSH dhe thuajse regjistrohet një dyfishim në raport me vitin 2020, kur TVSH-ja neto e arkëtuar regjistrohej në 47.9 miliardë lekë.
Ndër faktorët që kanë ndikuar në këtë perfomancë është normalizmi i çmimeve gjatë këtij viti, gjë që i ka shtyrë qytetarët të rrisin kërkesën dhe konsumin. Ky konsum është i lidhur edhe më rritjen e pagave në administratë, gjë që i ka dhënë më shumë mundësi qytetarëve për të shpenzuar. Sipas të dhënave të INSTAT pagat në shtet u rritën me 16% në tremujorin e parë të vitit aktual në raport me të njëjtën periudhë të një viti më parë.
Nga ana tjetër rritja e numrit të turistëve nga viti në vit konsiderohet gjithashtu si faktor kryesor për rritjen e konsumit. Këtë vit pritet që vendi ynë të vizitohet nga rreth 14 milionë turistë.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
