Autoriteti i Komunikimeve Elektronike dhe Postare (AKEP) ka miratuar një rregullore të re për mbrojtjen e përdoruesve të telefonisë celulare, e cila prek vlefshmërinë e kartave SIM, mënyrën e përdorimit të kreditit dhe transparencën e tarifave. Në të njëjtën mbledhje, të mbajtur më 29 tetor, Bordi i AKEP dha dritën jeshile edhe për testimin e teknologjisë satelitore Direct-to-Device (D2D), në bashkëpunim me Starlink/SpaceX.
Çfarë ndryshon për përdoruesit
Me rregulloren e re, kartat SIM do të jenë të vlefshme për 12 muaj, ndërsa kredia monetare do të ketë një afat minimal përdorimi prej 180 ditësh. Konsumatorët do të kenë mundësi të bëjnë rimbushje me vlera të ulëta, si dhe të kërkojnë kthimin e kreditit të papërdorur kur kalojnë numrin te një operator tjetër. Përveç kësaj, numri celular do të ruhet të paktën 12 muaj pas çaktivizimit.
Fund rritjeve automatike të tarifave
Ndryshime ka edhe për tarifat mujore. Duke filluar nga 1 janari 2027, operatorëve do t’u ndalohet të vendosin në kontrata klauzola që parashikojnë rritje automatike të tarifave mbi bazë përqindjesh ose indeksesh të ndryshueshme, si Indeksi i Çmimeve të Konsumit, për sa kohë vlera konkrete e tarifës së ardhshme nuk është e përcaktuar qysh në momentin e nënshkrimit të kontratës.
Testimi i internetit satelitor
Njëkohësisht, AKEP autorizoi kompaninë One Albania që të testojë për 120 ditë teknologjinë D2D, në bashkëpunim me Starlink/SpaceX. Kjo teknologji synon të lidhë drejtpërdrejt me satelitët telefonat celularë të përshtatshëm, duke zgjeruar mbulimin në zonat ku sinjali i rrjeteve tradicionale është i dobët ose nuk ekziston.
Masat e reja do të hyjnë në fuqi sipas afateve të përcaktuara në rregullore, ndërsa testimi pritet të vlerësojë mundësitë për zgjerimin e shërbimeve të komunikimit në Shqipëri.
