Kërkesa e individëve për kredi u raportua në rënie në tremujorin e parë të vitit 2026. Sipas vrojtimit të aktivitetit kreditues me bankat, të kryer nga Banka e Shqipërisë, rënia erdhi kryesisht për shkak të kërkesës më të ulët në blerjen e banesave.
Kredia për blerje banesash arriti nivele rekord gjatë vitit 2025, pavarësisht masave kufizuese të vendosura nga Banka e Shqipërisë. Megjithatë, tregu i këtij produkti duket të ketë shfaqur sinjale ngadalësimi në tremujorin e parë të këtij viti.
Bankat raportuan se kërkesa më e ulët për kredi në financimin e blerjes së banesave u nxit nga vonesat e krijuara në miratimin e udhëzimeve që duhet të shoqëronin Ligjin për Vlerësimin e Pasurive të Paluajtshme, por edhe nga kufizimet rregullatore në fuqi prej korrikut 2025.
Sipas vrojtimit, standardet e kreditimit për kreditë për shtëpi kanë ngelur të pandryshuara edhe këtë tremujor. Megjithatë, burime nga tregu bëjnë të ditur se disa banka kanë vendosur të jenë më të kujdesshme në këtë segment, edhe për shkak të shqetësimeve të lidhura me ciklin e pasurive të paluajtshme, sidomos në kryeqytet. Nga ana tjetër, edhe kërkesa e individëve për kredi për blerje pronash duket të jetë në rënie.
Ndërkohë, duket se bankat po e kompensojnë shtrëngimin në segmentin e kredive hipotekare me një qasje më agresive në atë të kredisë konsumatori. Vrojtimi i aktiviteti kreditues tregon se kushtet dhe termat e përgjithshëm për kreditë akorduar individëve u lehtësuan në tremujorin e parë të vitit, vetëm në segmentin e kredive konsumatorë.
Lehtësimi i kushteve të kreditimit erdhi nga aplikimi i marzheve më të ulëta mbi kreditë normale, nga shtimi i madhësisë së kredisë dhe nga zgjatja e maturitetit në kreditë konsumatore.
Lehtësimi i standardeve të kredive konsumatorë është nxitur nga konkurrenca në sistem bankar dhe toleranca më e lartë e bankave kundrejt marrjes përsipër të rrezikut.
Në tërësi, megjithatë, bankat raportojnë se shkalla e miratimit të kredive për individët u raportua në rënie në tremujorin e parë të vitit 2026. Rënia e saj u shkaktua nga treguesit e historikut të kreditit të lidhur me të dhënat nga regjistri i kredive dhe nga statusi i kredive aktuale.
Në tremujorin e dytë të vitit 2026, bankat presin që kërkesa për kredi të jetë e lartë, si për financimin e konsumit, ashtu edhe për blerjen e banesave, çka mund të lidhet pjesërisht edhe me nisjen e procesit të rivlerësimit të pasurive të paluajtshme.
Postimi ” Bankat raportuan rënie të kërkesës për kredi për shtëpi në tremujorin e parë ” eshte marre nga Revista Monitor.
