Shtrëngimi i mprehtë i kushteve financiare në mes të inflacionit të lartë, mund të çojë në recesion ekonominë globale në vitin 2023, sipas raportit Perspektiva Ekonomike Botërore, nga Fondi Monetar Ndërkombëtar (FMN).
Në raport, organizata ka rritur parashikimin për rritjen ekonomike të Bullgarisë këtë vit. Megjithatë, për vitin 2023, FMN-ja ka ulur ndjeshëm pritshmëritë për rritjen e Prodhimit të Brendshëm Bruto (PBB) të Bullgarisë.
FMN-ja parashikon se PBB-ja e Bullgarisë do të ngadalësohet në 3.9%, nga 4.2% në vitin 2021. Vlerësimi i mëparshëm parashikonte ngadalësim të rritjes ekonomike në 3.2%.
Për vitin 2023, ekonomia bullgare pritet të ngadalësohet në 3%.
Sipas të dhënave të publikuara, janë rritur pritshmëritë për inflacionin këtë vit dhe vitin e ardhshëm, si dhe për rritjen e papunësisë.
Sipas FMN-së, këtë vit, inflacioni në Bullgari do të rritet më shpejt se sa pritej – deri në 12,4%, krahasuar me 11% të parashikuar më parë. Në vitin 2023, rritja e çmimeve të konsumit pritet të ngadalësohet në 5.2%.
Vlerësimi aktual parashikon rritje pak më të fortë të papunësisë në Bullgari – deri në 5.1% këtë vit dhe 4.7% në vitin 2023, krahasuar me 4.9% dhe 4.6% në parashikimin e mëparshëm.
Frika nga një recesion u rrit këtë vit, pasi bankat qendrore në mbarë botën sinjalizuan vendosmërinë për të luftuar inflacionin e lartë, thuhet në Raportin e Stabilitetit Financiar Global të FMN-së.
“Mjedisi global është i paqëndrueshëm dhe janë shfaqur re stuhie në horizont. Inflacioni tani është në nivelet më të larta që prej shumë vitesh dhe është përhapur në të gjithë vendet. Perspektiva ekonomike në shumë vende vazhdon të përkeqësohet. Në të njëjtën kohë, mbeten edhe rreziqet gjeopolitike”, thuhet në raport. “Çmimet e aseteve u rritën nga frika e recesionit, për shkak të mungesës së gazit natyror dhe rishfaqjes së rreziqeve të fragmentimit në Eurozonë”, shtoi raporti.
FMN-ja tha se tregjet në zhvillim po përballen me rreziqe të ndryshme që rrjedhin nga forcimi i Dollarit amerikan, rritja e kostove të huamarrjes së jashtme, inflacioni i lartë, tregjet e paqëndrueshme, rritja e pasigurisë rreth perspektivës ekonomike globale dhe trysnia nga shtrëngimi i politikave monetare në ekonomitë e përparuara.
Sipas FMN-së, në sektorin privat, firmat e mëdha kanë përjetuar tkurrje të marzheve të fitimit për shkak të kostove më të larta dhe firmat e vogla kanë falimentuar, pasi janë më të prekura nga rritja e kostove të huamarrjes.
Organizata paralajmëroi se shtrëngimi agresiv i politikës monetare nga bankat qendrore, i cili po rrit kostot e huamarrjes dhe po shtrëngon standardet e kreditimit, mund të ndikojë negativisht në tregjet e banesave.
Postimi ” Bullgari, rritje e ngadaltë ” eshte marre nga Revista Monitor.
