Drejtoria e Përgjithshme e Doganave po zbaton prej 1 korrikut 2026 sistemin e përmirësuar të pullave fiskale, i cili parashikon identifikim unik digjital për çdo pullë, aktivizim elektronik dhe gjurmim të produkteve subjekt akcize.
Në një takim me përfaqësues të ALBTrace CO sh.a. dhe operatorë ekonomikë nga sektorët e duhanit, pijeve alkoolike dhe produkteve të tjera subjekt akcize, Doganat diskutuan çështjet praktike që lidhen me furnizimin, përdorimin, aktivizimin dhe verifikimin e pullave.
Drejtori i Përgjithshëm i Doganave, Besmir Beja, tha se modernizimi i administrimit të pullave fiskale duhet të sjellë “më shumë eficiencë në proceset e operatorëve ekonomikë dhe forcim të kontrollit e të gjurmueshmërisë së produkteve subjekt akcize”.
Sipas njoftimit, sistemi kombinon elementet fizike të sigurisë me teknologjinë digjitale dhe pajis çdo pullë fiskale me një identifikues unik, i cili lidhet me të dhënat e produktit. Kjo mundëson “gjurmimin, monitorimin dhe verifikimin e produkteve gjatë ciklit të tyre të qarkullimit”.
Proceset e administrimit të pullave, nga parashikimi dhe porositja deri te aktivizimi dhe monitorimi, do të kryhen në mënyrë digjitale. Aktivizimi realizohet përmes aplikacionit web dhe aplikacionit mobil të integruar me sistemin qendror.
Për pullat e furnizuara në rul, operatorët mund të kryejnë aktivizimin përmes skanimit ose identifikimit të një intervali pullash, duke skanuar pullën e parë dhe të fundit. Përdorimi i tyre regjistrohet më pas në sistem dhe lidhet me produktet ku janë aplikuar.
Operatorët ekonomikë ngritën gjatë takimit çështje që lidhen me “formatin dhe procesin e furnizimit me pulla, dëmtimet gjatë përdorimit, identifikimin e produkteve dhe funksionalitetet e aktivizimit e të verifikimit”, sipas njoftimit të Doganave.
Sistemi ndryshon edhe mënyrën e furnizimit me pullat fiskale për duhanin. ALBTrace CO sh.a. ua ofron tashmë operatorëve pullat të prera dhe të gatshme për aplikim, në vend që prerja të kryhet nga operatorët përmes palëve të treta. Sipas njoftimit, ndryshimi “eliminon nevojën për përpunim të mëtejshëm, redukton kohën dhe kostot operative dhe siguron një proces më të standardizuar dhe më efikas”.
Kuadri i ri u jep gjithashtu konsumatorëve mundësinë të kontrollojnë autenticitetin e produkteve subjekt akcize përmes aplikacionit publik ALBConnect. Duke skanuar identifikuesin unik të pullës, përdoruesi mund të verifikojë në kohë reale autenticitetin e produktit dhe të raportojë raste të dyshimta ose produkte potencialisht të falsifikuara.
Drejtoria e Përgjithshme e Doganave do të mbikëqyrë sistemin, përfshirë miratimin e porosive të pullave dhe kontrollin e kërkesave ligjore. Sipas kuadrit të ri, porositë duhet të miratohen nga autoriteti doganor brenda dy ditëve pune nga marrja e tyre përmes Sistemit të Gjurmueshmërisë dhe Kontrollit të ALBTrace.
Doganat thanë se do të vijojnë monitorimin e sistemit dhe dialogun me operatorët, si dhe do të ofrojnë trajnime për subjektet që hasin vështirësi në aktivizimin e pullave fiskale.
Postimi ” Doganat dialog me operatorët ekonomikë për zbatimin e sistemit të përmirësuar të pullave fiskale ” eshte marre nga Revista Monitor.
