Energjia elektrike mbetet një nga zërat më të rëndë në buxhetet e ujësjellësve, duke përbërë rreth një të katërtën e shpenzimeve operative dhe të mirëmbajtjes së sektorit. Raporti i performancës i hartuar nga Enti Rregullator i Ujit (ERRU) tregon se gjatë vitit 2025 këto shpenzime u shtuan me 85.8 mln lekë, që i korrespondon një rritjeje prej 3.5% në krahasim me vitin paraardhës.
Durrësi dhe Fieri, kontribuesit kryesorë
Pjesën më të madhe të kësaj rritjeje e kanë shkaktuar shoqëritë rajonale të ujësjellës-kanalizimeve të Durrësit dhe Fierit. Në rastin e Durrësit, raporti e shpjegon shtimin e kostove kryesisht me rritjen e vëllimit të ujit të prodhuar dhe të shpërndarë. Kjo ka bërë që stacionet e pompimit të punojnë më shumë orë, duke konsumuar rrjedhimisht më shumë energji elektrike.
Më shumë se gjysma e shoqërive nuk mbulojnë kostot
Pagesa e faturave të energjisë vijon të jetë sfidë për një pjesë të madhe të sektorit. Nga 17 shoqëri që ushtruan aktivitet gjatë vitit 2025, vetëm 8 arritën t'i mbulonin shpenzimet operative dhe të mirëmbajtjes me të ardhurat e faturuara. Nëntë shoqëritë e tjera, pra 53% e totalit, mbetën nën këtë nivel mbulimi.
Sipas ERRU-së, kjo situatë shoqërohet me grumbullimin vit pas viti të detyrimeve të prapambetura ndaj OSHEE-së, pavarësisht subvencioneve që qeveria ka akorduar për sektorin.
Borxhi i jobuxhetorëve vijon të rritet
Të dhënat e Entit Rregullator të Energjisë (ERE) tregojnë se në fund të qershorit 2026, borxhi i klientëve jobuxhetorë, kategori ku bëjnë pjesë edhe ujësjellësit, arriti në 21.21 mld lekë. Krahasuar me fundin e vitit 2025, detyrimet e kësaj kategorie u rritën me 296 milionë lekë, ndërsa në raport me fundin e vitit 2024 shtesa arrin rreth 1.66 miliardë lekë.
ERRU parashikon që kostot e energjisë do të vazhdojnë të kenë ndikim të ndjeshëm në financat e sektorit, për aq kohë sa një pjesë e shoqërive nuk gjenerojnë të ardhura të mjaftueshme për të mbuluar tërësisht shpenzimet operative.
