Faturat e energjisë elektrike do të llogariten mbi bazën e konsumit historik në rastet kur matësi është i dëmtuar ose nuk mund të lexohet, por për një periudhë jo më të gjatë se tre muaj. Kjo parashikohet në projektmetodologjinë që Enti Rregullator i Energjisë (ERE) ka nxjerrë për konsultim publik, e cila përcakton si do të përllogariten këto fatura dhe si do të korrigjohen pasi të sigurohen të dhënat reale.

Kur zbatohet faturimi me vlerë referuese

Sipas dokumentit, faturimi me vlerë referuese do të aplikohet kur të dhënat e matjes mungojnë ose janë të paarritshme për më shumë se një muaj. Ndër shkaqet përmenden dëmtimi i matësit, funksionimi i tij jashtë kushteve teknike ose pamundësia për të aksesuar të dhënat e matjes.

Si do të llogaritet konsumi

Projekti vendos një rend përparësie për përllogaritjen:

  • Në radhë të parë do të merret sasia e energjisë e matur në të njëjtin muaj të vitit paraardhës.
  • Nëse kjo e dhënë nuk ekziston, furnizuesi do të përdorë mesataren mujore të konsumit të regjistruar në 12 muajt e fundit.
  • Për kontratat me vetëm një deri në 11 muaj matje faktike, mesatarja do të nxirret nga muajt për të cilët ka të dhëna.
  • Klientët që nuk kanë asnjë muaj me matje faktike propozohet të faturohen me vlerë referuese zero kilovatorë, për jo më shumë se tre muaj radhazi.

Kjo e fundit nuk nënkupton përjashtim nga pagesa e konsumit real, pasi fatura do të rregullohet sapo të dhënat të bëhen të disponueshme.

Korrigjimi i faturave

Nëse konsumi faktik del më i lartë se ai i faturuar, diferenca do t’i shtohet klientit në faturën e radhës. Në rastin e kundërt, shuma përkatëse do t’i zbritet nga detyrimi. Fatura duhet të tregojë qartë konsumin e përllogaritur më parë, konsumin faktik dhe diferencën e korrigjuar.

Furnizuesit do të jenë të detyruar t’i raportojnë ERE-s çdo katër muaj për faturimet me vlerë referuese dhe korrigjimet e kryera. Dokumenti nënvizon se ky mekanizëm ka karakter të përkohshëm dhe nuk mund të zëvendësojë përgjithmonë faturimin mbi bazën e konsumit të matur.