Kamerat e sigurisë, që familjet dhe bizneset i instalojnë për t’u mbrojtur nga vjedhjet, mund të shndërrohen në një mjet që u shërben personave të paautorizuar. Ky është paralajmërimi i Nadia Elbasanit, eksperte e sigurisë kibernetike.
Sipas saj, përmes këtyre pajisjeve, ata që arrijnë të fitojnë qasje pa leje mund të mësojnë rutinën e përditshme të një familjeje, lëvizjet e punonjësve brenda një kompanie apo informacione konfidenciale që lidhen me veprimtarinë e një biznesi.
Rreziku që vjen nga mbrojtja
Paradoksi, sipas ekspertes, qëndron në faktin se një pajisje e menduar për të rritur sigurinë fizike mund të krijojë një dobësi të re në planin dixhital. Elbasani shpjegon se cenueshmëria e këtyre sistemeve nuk lidhet thjesht me vetë pajisjen, por me mënyrën se si ato përdoren dhe menaxhohen.
Paralajmërimi vjen në një kohë kur gjithnjë e më shumë shtëpi dhe biznese mbështeten te sistemet e vëzhgimit me kamera për mbrojtjen e pronës dhe të aktivitetit të tyre.
