Nerta Tushe, Administratore BIOCOSM
Tendenca globale ku fytyra të njohura publike vendosin të investojnë në prodhimin e markave të tyre kozmetike apo kujdesit personal është bërë pjesë edhe e realitetit shqiptar.
Këngëtarë apo moderatorë kanë sot në treg linja të ndryshme të kujdesit për bebet, flokët, lëkurën.
Nerta Tushe, administratore e laboratorit BIOCOSM, pohon se kërkesat për prodhim linjash kozmetike apo kujdesi personal kanë qenë në rritje, si nga sipërmarrës vendas, edhe të huaj.
Aktualisht ajo prodhon për Zvicrën, Dubain dhe Shtetet e Bashkuara të Amerikës sipas marrëveshjeve që ka me kompani të ndryshme.
Tendenca e prodhimit është zhvendosur kryesisht te produktet organike si një kërkesë e rritur edhe e konsumatorëve për të eliminuar përbërësit e dëmshëm dhe jetën e shëndetshme.
A mund të bëni një prezantim të shkurtër të profilit të kompanisë suaj?
Jemi një kompani që prodhojmë produkte kozmetike organike. Laboratori ynë operon prej 5 vitesh në tregun shqiptar. Aktivitetin tonë e kishim më parë në Athinë dhe jemi transferuar. Si fillim laboratori ka prodhuar vetëm produkte kozmetike.
Më pas, duke parë që Shqipëria është e pasur me bimë mjekësore, kemi bërë grumbullim dhe përpunim të tyre për të ruajtur një traditë shqiptare. Në laboratorin tonë, përveç produkteve kozmetike të linjës sonë individuale, prodhohen edhe produkte të 17 kompanive të tjera.
Prodhojmë për Zvicrën, Dubain, kemi hyrë në Londër dhe jemi duke punuar për shtetin e Nju Jorkut. Në tregun shqiptar kemi prodhuar produkte të kujdesit personal për lëkurën dhe flokët.
Kemi vijuar edhe me linja shqiptare që bazohen te kozmetika luksoze dhe organikja, pa përdorur përbërës, të cilët shkaktojnë efekte anësore në shëndetin tonë.
Na është dashur në raste të veçanta deri në dy vite punë për linja të caktuara, siç është ajo e bebave i Miriam Canit, për shkak të përbërësve të veçantë të ardhur nga Europa dhe me një lloj certifikimi që na e bëri punën sfiduese, pasi në Ballkan nuk e kishte ndonjë laborator tjetër.
Ku e siguroni lëndën e parë për produktet tuaja, duke pasur parasysh që ne kemi bimë mjekësore, por përpunimi i tyre nuk është i zhvilluar?
Të gjitha lëndët e para i marrim nga Greqia, Italia apo Franca, duke qenë se në Shqipëri nuk disponojmë kolagjen, s’kemi emulgues apo acid hialuronik apo ndonjë lëndë tjetër të nevojshme. Të gjitha këto jemi të detyruar t’i sjellim nga jashtë.
Shqipëria jonë nuk prodhon as xham dhe as plastikë, kështu që edhe tapat apo aksesorët e ndryshëm i marrim po jashtë. E vetmja gjë që prodhojmë në Shqipëri janë vajrat esencialë, një ndër lëndët e para për industrinë tonë të cilat ne i përdorim në laborator sipas standardeve dhe ky është sekreti ynë.
Për të nxjerrë një litër vaj esencial duhen tonë të tëra bimësh për të arritur rezultatin e mirë që kanë vajrat. Sigurisht për çdo vaj esencial duhet të jesh i specializuar mbi përdorimin, por rezultatet janë shumë të mirë dhe afatgjatë. Shqipëria ka potencial të jashtëzakonshëm në këtë aspekt pasi është e pasur me bimë mjekësore.
Tregu juaj i shitjeve është vetëm në Shqipëri, apo jeni zgjeruar edhe në tregje të tjera?
Tregu shqiptar është pjesë shumë e rëndësishme e jona, sepse këtu ushtrojmë aktivitetin. Jam rritur dhe kam studiuar në Greqi, por gjithmonë kam pasur dashuri të veçantë për vendin tim. Kur morëm vendimin të vendoseshim këtu, rol të rëndësishëm ka luajtur edhe kjo ndjenjë, përpos faktit që shihja që ky treg i industrisë kozmetike në Shqipëri, nuk është i zhvilluar dhe ka hapësira për t’u rritur.
Gjatë kohës që laboratori ishte në Greqi, një pjesë e klientëve të linjës sonë ishin shqiptarë dhe na jepnin një përshtypje të vazhdueshme dhe pozitive. Kjo më bindi edhe më shumë që të vija dhe të krijoja diçka më të madhe dhe timen.
Nga momenti që kemi hapur laboratorin, puna ka ecur shumë mirë. Mendoj se ka ndikuar fakti që s’ka konkurrencë, pasi në prodhim nuk ka kompani të angazhuara në kozmetikë. Për ne mungesa e fabrikave të kësaj natyre është avantazh.
Por ashtu siç ndodh rëndom, aty ku nuk ka zhvillim të një industrie të re, edhe terreni ku ti shkel është i panjohur. Në Shqipëri nuk e njihnin kozmetikën në prodhim dhe kjo na ka sjellë vështirësi. Ne ishim mësuar me një tjetër formë pune, ku për çdo produkt që prodhonim, duhet të krijonim, dokumentin diçka që në Shqipëri nuk njihej. Kishte një rregullore që edhe ajo nuk ishte shumë e qartë.
Tani është miratuar një ligj dhe gjërat janë bërë disi më të qarta dhe nga ana procedurale. Për të qenë korrekt me kërkesat e shtetit, ne ndërkohë kemi investuar që nga fillimi për staf të kualifikuar, si kimist, biolog, jurist e çdo hallkë të nevojshme që ka për detyrë të hartojë një dosje produkti, e cila dorëzohet më pas në ministri për t’u miratuar. Kjo është shumë e rëndësishme para se produkti të dalë në treg.
Përveç produkteve tuaja a keni marrëdhënie nënkontraktimi për prodhim për kompani të tjera dhe si ka qenë interesi i tyre nga viti në vit?
Përveç produkteve tona, prodhojmë dhe për kompani shqiptare që eksportojnë direkt në Zvicër. Përshtypja për to është e mirë. Ndërkohë kemi dhe linja të tjera individuale, siç është njëra për pastrimin e orëve të shtrenjta apo kozmetikës së shtrenjtë, me qendër në Dubai.
Po punojmë për një linjë për moshat e reja për në Nju Xhersi në Shtetet e Bashkuara të Amerikës. Paralelisht me Shqipërinë, numri i klientëve jashtë saj po rritet.
Pandemia dhe çmimi i energjisë kanë rritur ndjeshëm kostot e prodhimit për thuajse çdo industri. Sa janë rritur kostot tuaja dhe si po arrini ta amortizoni efektin?
Pandemia pati ndikime të ndryshme tek industria kozmetike që jo të gjitha ishin negative. Për shembull, ne vumë re që njerëzit, duke mos pasur mundësi të udhëtonin dhe të blinin produkte jashtë rritën blerjet brenda vendit, duke i dhënë mundësi edhe markave vendase për t’i njohur.
Disa prej tyre, që patën përshtypje të mira, mbetën dhe u bënë klientë besnikë, të tjerët siç është edhe natyra njerëzore në përgjithësi janë gjithmonë në kërkim të diçkaje të re. Markat shqiptare në përgjithësi janë disi të paragjykuara, por pandemia mendoj se ndikoi pozitivisht, pasi e bëri më të dukshme dhe më të vlerësuar punën e kompanive kozmetike shqiptare.
Gjatë COVID-19 u bë më e thjeshtë për kompanitë që kishin kozmetikë, higjienë e kujdes personal që të tregtonin. Deri diku, kjo krijoi pak likuiditet dhe na dha dorë në një moment të vështirë që të merrnim frymë si biznes.
Një ndihmë e madhe në atë kohë na është dhënë dhe nga mundësimi i procedurave të shpejta të administratës, kryesisht flas këtu për doganën që nuk na solli pengesa. Sa i takon ndihmës, në atë periudhë nuk jemi trajtuar me diçka si kategori biznesi.
Kemi paguar rregullisht të gjitha taksat dhe nuk ka pasur ndonjë gjë specifike lehtësuese nëpër paketa fiskale, sepse kozmetika cilësohet si produkt luksi dhe si e tillë nuk shihet me rëndësi.
Pandemia dhe çmimi i energjisë kanë rritur ndjeshëm kostot e prodhimit në thuajse çdo industri. Sa janë rritur kostot tuaja dhe si po arrini ta amortizoni efektin?
Kostot janë rritur dhe këto janë vënë re së pari tek ambalazhet. Fatmirësisht, ne kemi pasur rritje edhe të numrit të klientëve, çfarë ka sjellë rritje në volumeve që porosisim për ambalazhe e për rrjedhojë, kemi arritur të marrim çmime të mira, por sërish janë me 50% më shumë.
Pavarësisht kësaj, jemi munduar të mos rrisim çmimet duke gjetur forma nga më të ndryshmet për ta amortizuar, sepse në momentin që këtë kosto e reflektuam te klientët, pamë një reagim shumë negativ, duke na refuzuar këtë rritje. Ndaj jemi rikthyer ku ishim duke kërkuar mënyra të tjera.
Siç e thashë, një formë ishte rritja e sasisë së porositur që na jep çmim më të leverdishëm për njësi. Të njëjtën gjë aplikuam edhe për lëndët e para bazë për industrinë tonë, siç është për shembull, le të themi vaji i bajames.
Më parë, merrnim 50 litra që të mos bllokoheshim dhe të kishim likuiditet në çdo moment. Zgjodhëm që të merrnim një kredi dhe të porosisnim direkt nga fabrika 2-3 tonë vaj bajamesh, duke eliminuar hallkën e tregtarit që na e shiste ne. E vetmja që fituam nga këto hapa është mosshtrenjtimi i produktit.
Cila është qasja që vini re te prodhuesit sa i takon mënyrës sesi i konceptojnë produktet dhe përbërja që vendosin të çojnë te klienti?
Janë ndërgjegjësuar më tepër me kalimin e kohës dhe kur iu shpjegon përbërësit e dëmshëm siç janë sulfatet për flokët apo konservantët paraben e kimikate të ndryshme që nuk janë të përshtatëm për produktet organike janë mirëkuptues.
Një përbërësi të dëmshëm i duhet më pak se 8 sekonda për të depërtuar në gjak e për t’u bërë toksik, ndaj shumica pranojnë që produkti të dalë pak më i shtrenjtë, por nuk është i dëmshëm. Kjo është forma me të cilën kemi vepruar këto vite dhe kemi rënë dakord që të punohet me produkte organike.
Tendenca ime është të punoj vetëm për produkte organike. Duke qenë se me profesion jam biologe, nuk do të mundja kurrë të krijoja një produkt që përmban silikon, paraben. Është jashtë natyrës që kam studiuar për ta krijuar.
Si ka ndryshuar gjatë këtyre viteve sjellja e konsumatorëve, cila është tendenca që keni vënë re?
Është bërë zhurmë e madhe për produktet kozmetike dhe kjo është gjëja më e mirë që ka ndodhur, pasi na e ka bërë më të lehtë punën për të shpjeguar te klienti produktin që ata marrin. Janë të predispozuar gjithashtu të paguajnë pak më shtrenjtë, por të kenë sigurinë që është produkt organik dhe përshtypja pozitive ka shumë rëndësi.
Ndërgjegjësimi për të shkuar drejt produkteve organike ka ardhur, mendoj, edhe si efekt i rritjes së disa sëmundjeve dhe problemeve shëndetësore, çfarë ka ndarë rrugët me përbërjet e dëmshme dhe orientimin drejt organikes.
Gjithsesi, edhe industria kozmetike në vend mendoj se ka disa problematika, që lidhen me kontrollin dhe monitorimin e atyre që prodhojnë produkte, të cilat nuk kalojnë të gjitha hallkat e nevojshme.
Ka lindur një tendencë që, sapo përfundohet një shkollë si biologjia apo farmacia, nisin të prodhojnë produkte kozmetike, të cilat në mënyrë kategorike nuk mund të shiten, nëse s’dalin nga një subjekt i licencuar.
Nuk po them për produkte e përzierje bazë, pasi kjo nuk ka rrezik, por prodhimi i kozmetikës kërkon më shumë përgjegjshmëri dhe dokumentacion përkatës. Ne që jemi prodhues prekemi dyfish nga kjo tendencë.
Së pari, sepse respektojmë gjithë kërkesat ligjore e hallkat e nevojshme e për rrjedhojë na rriten kostot, duke e bërë konkurrencën të padrejtë.
Së dyti është edhe një rrezik imazhi, pasi për ato raste kur produktet mund të mos i japin efekt klientit, ose me keq akoma mund t’i japin efekt të keq, paragjykohet e gjithë industria kozmetike shqiptare.
Postimi ” “Kërkesat për prodhim nga kompanitë kozmetike janë në rritje” ” eshte marre nga Revista Monitor.
