11.5 C
Tirana
E shtunë, 24 Shkurt 2024

Këtë muaj mbyllet blerja e Alpha nga OTP, Banka e Shqipërisë nuk pret bashkime të tjera në afat të shkurtër

Banka e Shqipërisë pritet që të japë gjatë muajit korrik dritën e gjëlbër për blerjen e Alpha Bank Albania nga grupi hungarez OTP.

Duhen Lexuar

Në mbledhjen e datës 6 korrik, Këshilli Mbikëqyrës do të marrë në shqyrtim transaksionin dhe pritet t’i japë miratimin final të nevojshëm për finalizimin e tij. Në muajin mars, blerja është autorizuar edhe nga Autoriteti i Konkurrencës.

Blerja e Alpha Bank Albania nga OTP pritet ta ulë numrin e bankave të sektorit nga 12 në 11, duke e çuar më tej procesin e konsolidimit të sektorit që nisi në vitin 2018. Me blerjen e Alpha Bank, pjesa e tregut e OTP në Shqipëri pritet të arrijë në afërsisht 11% dhe do të vazhdojë të renditet e pesta në treg për nga madhësia, pas BKT, Credins, Raiffeisen, dhe Intesa Sanpaolo. Megjithatë, OTP do të fitojë një pjesë ndjeshëm më të larta në tregun e kredisë, ku do të arrijë në mbi 16% të totalit, duke kaluar BKT dhe duke u renditur si huadhënësi i tretë më i madh, pas Credins Bank dhe Raiffeisen Bank. Blerja e Alpha do t’i japë OTP një rritje të konsiderueshme edhe në tregun e depozitave, ku aktualisht mban 6.7%, ndërsa pas blerjes së Alpha do të arrijë në 11.3%, afërsisht me të njëjtën pjesë tregu sa Intesa Sanpaolo.

Burime nga Banka e Shqipërisë bëjnë të ditur se, në afatin e shkurtër, nuk pritet një ulje e mëtejshme e numrit të bankave. Asnjë prej aktorëve të ngelur nuk ka dhënë sinjale apo indicie se synon të largohet nga tregu shqiptar.

Zhvillimi më i afërt pritet të jetë zgjerimi i pjesës së kontrolluar nga kompania e sigurimeve Eurosig në Bankën e Bashkuar të Shqipërisë (UBA). Pritet që brenda këtij viti, Eurosig të arrijë në më shumë se 70% të aksioneve në këtë bankë (nga rreth 51% që mban aktualisht), me qëllim për të kontrolluar plotësisht vendimmarrjen.

Ndërkohë që për momentin konsolidimi i sektorit pritet të ndalet në 11 banka, tashmë pranë Bankës së Shqipërisë ka shfaqje interesi nga aktorë të rinj që synojnë të hyjnë në tregun shqiptar. Një interes në parim kanë shfaqur banka që veprojnë në tregun kosovar, ku profili më i mundshëm është ai i Bankës Ekonomike të Kosovës, në pronësi të biznesmenit Bexhet Pacolli.

Një aktor tjetër që synon të plotësojë mozaikun e pranisë rajonale, duke zbarkuar edhe në Shqipëri, është banka sllovene Nova Ljubjanska Banka (NLB). Megjithëse e ka manifestuar interesin edhe zyrtarisht, deri tani NLB nuk ka ndërmarrë nisma konkrete.

Interes për t’u licencuar për aktivitet bankar kanë shfaqyur edhe institucione të mikrofinancës, por në këtë pikë Banka e Shqipërisë nuk ka dhënë shumë shpresa dhe ka bërë të qartë se do të lejojë hyrje të reja në treg vetëm në rast të partneritetit me investitorë të secializuar, e thënë ndryshe, banka me përvojë nga jashtë vendit.

Ndërkohë, një interes i lartë po regjistrohet në kahun e kundërt, me banka shqiptare që synojnë të hyjnë në tregun Kosovar. Një interes të tillë e ka shfaqur në parim Tirana Bank, që po vlerëson mundësitë për blerje në tregun e Kosovës. Në Kosovë veprojnë tashmë dy bankat më të mëdha shqiptare, Banka Kombëtare Tregtare dhe Credins Bank.

Burimi:Monitor
- Reklama -
spot_img
- Reklama -

Artikujt e Fundit