Sektori bankar e ka rritur më tej kreditimin jashtë vendit në muajt e parë të këtij viti.
Të dhënat nga Banka e Shqipërisë tregojnë se në fund të muajit prill, kredia e dhënë për huamarrës jorezidentë në Shqipëri arriti në 76.85 miliardë lekë.
Që nga fillimi i vitit, ky portofol është rritur me 9 miliardë lekë, ose më shumë se 13%.
Ndërsa me bazë krahasimi vjetore, rritja ka arritur në afërsisht 24%.
Kredia për jorezidentët ka arritur nivelin më të lartë që preh shkurtit të vitit 2018.
Mbështetur në statistikat e Bankës së Shqipërisë, në fund të muajit prill huaja për jorezidentët përbën rreth 7.4% të portofolit të sektorit bankar, nga rreth 6.7% që zinte një vit më parë.
Kredia e sektorit bankar për jorezidentët pati arritur arriti nivelet më të larta historike në mesin e vitit 2017. Një pjesë e madhe e kredisë jashtë vendit lidhej sidomos me aktivitetin e degës së Bankës Kombëtare Tregtare në Kosovë.
Pasi dega në fjalë u nda nga banka mëmë në Shqipëri, në fillim të vitit 2019, kjo kredi pësoi rënie të ndjeshme. Edhe në momentin kur kredia jashtë vendit arriti pikun, ajo ishte e kufizuar në pak banka të mëdha të sistemit.
Aktualisht, e vetmja bankë shqiptare që vepron me degë jashtë vendit është Credins Bank, që ka aktualisht tetë degë në Kosovë.
Nga pikëpamja statistikore, portofoli i Credins Kosovë klasifikohet si kredi për jorezidentët, megjithëse banka ushtron aktivitet si bankë lokale në Kosovë. Në fund të tremujorit 2025, Credins Kosovë raportonte një portofol kredie prej 89 milionë eurosh.
Sipas Bankës së Shqipërisë, kredia për subjektet jorezidente në pjesën më të madhe është kredi e dhënë për bizneset, e dominuar kryesisht nga maturiteti afatgjatë.
Banka të veçanta kanë eksploruar alternativa huadhënieje në vendet e rajonit, duke pasur parasysh edhe sasinë e mëdha të fondeve në valutë të huaj.
Pjesa më e madhe e depozitave të publikut në sektorin bankar janë në Euro, por tregu i brendshëm nuk ofron alternativa të tjera të investimit të fondeve në valutë të huaj, përveç kredidhënies.
Në vitet e fundit kreditimi po shfaqet gjithnjë e më i orientuar drejt Lekut, i nxitur edhe nga politikat e Bankës së Shqipërisë për uljen e përdorimit të Euros dhe për shmangien e rrezikut të kursit të këmbimit. Në këto kushte, disa prej bankave të sistemit kanë eksploruar edhe tregjet e huaja të huadhënies, me fokus kryesisht te klientët biznes.
Në teori, rritja e ekspozimeve të kredisë jashtë vendit mund të shtrojë rreziqe shtesë, lidhur me faktorë si vështirësitë për ndjekjen e aktivitetit të klientëve, ose ndryshimeve në kuadrin ligjor, të lidhur me nevojat eventuale për ekzekutimin e kolateraleve ose mbledhjen e të detyrimeve.
Megjithatë, sipas Bankës së Shqipërisë, cilësia e kredisë mbetet në nivele të ulëta dhe të krahasueshme me raportin e kredive me probleme brenda./ E.Shehu
Burimi: Banka e Shqipërisë
Postimi ” Kredia e dhënë jashtë vendit arrin nivelin më të lartë që prej vitit 2018 ” eshte marre nga Revista Monitor.
