Çmimet e naftës u rritën sërish në tregjet ndërkombëtare pasi Presidenti amerikan Donald Trump e cilësoi si “plotësisht të papranueshme” përgjigjen e Iranit ndaj propozimit amerikan për armëpushim, duke shtuar frikën se kriza në Lindjen e Mesme dhe bllokimi i Ngushticës së Hormuzit do të zgjasin më shumë se sa pritej.
“Nafta Brent u rrit me 2.67%, në 103.99 dollarë për fuçi, ndërsa gjatë sesionit preku 105.99 dollarë. Nafta amerikane WTI u ngjit në 97.66 dollarë për fuçi, pasi më herët kishte kaluar përkohësisht pragun e 100 dollarëve.”
Rritja erdhi vetëm pak ditë pasi tregjet kishin reaguar pozitivisht ndaj sinjaleve për një marrëveshje të mundshme mes Uashingtonit dhe Teheranit.
Trump deklaroi në rrjetet sociale se kushtet e vendosura nga Irani ishin “TOTALISHT E PAPRANUESHME”, pa dhënë detaje të mëtejshme.
Sipas raportimeve, Teherani kishte kërkuar heqjen e sanksioneve, kompensim për dëmet e luftës dhe njohjen e sovranitetit iranian mbi Ngushticën e Hormuzit, një nga korridoret më të rëndësishme energjetike në botë.
Ngushtica e Hormuzit, përmes së cilës kalon rreth 20% e furnizimit global me naftë, mbetet ende pjesërisht e bllokuar, duke mbajtur të larta tensionet në tregjet energjetike. Analistët paralajmërojnë se çdo vonesë në rihapjen e plotë të saj mund të krijojë mungesa të reja furnizimi dhe presion të mëtejshëm mbi çmimet globale të energjisë.
Tregu po reagon gjithnjë e më shumë ndaj zhvillimeve politike dhe deklaratave të liderëve, ndërsa investitorët po përpiqen të kuptojnë nëse negociatat SHBA-Iran mund të rikthehen në tryezë apo nëse konflikti do të përshkallëzohet sërish.
Kriza e Hormuzit konsiderohet tashmë një nga goditjet më të mëdha për tregun global të energjisë në dekada. Çmimi i Brent arriti deri në 126 dollarë për fuçi në kulmin e tensioneve, ndërsa Agjencia Ndërkombëtare e Energjisë e ka cilësuar situatën si “sfidën më të madhe globale për sigurinë energjetike”./Reuters
Postimi ” Nafta i afrohet 105 dollarëve, pasi Trump refuzon ofertën e Iranit për paqe ” eshte marre nga Revista Monitor.
