Rifillimi i përplasjeve mes SHBA-së dhe Iranit ka shtuar frikën për një përshkallëzim të ri të konfliktit.
Çmimet e gazit natyror në Europë arritën nivelin më të lartë që nga viti 2023, ndërsa nafta preku nivelin më të lartë në pesë javë, duke u ngjitur deri në 97 dollarë për fuçi të mërkurën. Lëvizja erdhi pasi rifillimi i sulmeve mes SHBA-së dhe Iranit rriti shqetësimet për një zgjerim të konfliktit.
Nafta Brent, standardi ndërkombëtar i çmimeve të naftës, u rrit me deri në 2.5%, duke kaluar pak mbi 97 dollarë për fuçi, përpara se të ulej në afërsisht 95 dollarë për fuçi në Londër.
Çmimi i gazit natyror në qendrën europiane TTF në Holandë kaloi 75 euro për megavat/orë për herë të parë që nga fillimi i luftës në shkurt, duke arritur nivelin më të lartë që nga fillimi i vitit 2023.
Rritja e çmimeve pasoi një valë të re sulmesh amerikane ndaj Iranit të martën, e dyta brenda pak ditësh. Kjo shtoi shqetësimet e investitorëve për një përshkallëzim të mëtejshëm mes dy vendeve, pas një periudhe relativisht të qetë gjatë gushtit.
“Perceptimi se ky konflikt mund të përfundojë deri në Krishtlindje po zbehet me shpejtësi”, tha Mike Bell, drejtues i strategjisë së tregjeve në RBC BlueBay Asset Management. “Kjo po lëviz tregjet.”
Uashingtoni dhe Teherani po përballen për kontrollin e Ngushticës së Hormuzit, një prej rrugëve më të rëndësishme për furnizimin global me naftë.
Rritja e çmimeve të naftës dhe gazit vijoi të ushtrojë presion mbi tregjet globale të obligacioneve dhe aksioneve, duke rikthyer shqetësimet se ekonomia botërore mund të përballet me një periudhë të zgjatur inflacioni.
Yield-i i bonove 10-vjeçare të Thesarit amerikan u rrit në 4.81% të mërkurën në mëngjes, niveli më i lartë që nga viti 2023.
Yield-i i obligacioneve 10-vjeçare gjermane u rrit me 0.04 pikë përqindjeje, në 3.37%, duke mbajtur kostot e huamarrjes së Gjermanisë në nivelin më të lartë që nga viti 2011.
Në Mbretërinë e Bashkuar, kostot e huamarrjes arritën nivelin më të lartë që nga viti 2008 për të dytën ditë radhazi, me yield-in e obligacioneve 10-vjeçare që u rrit me 0.04 pikë përqindjeje, në 5.26%.
Rritja e çmimeve të gazit ka ushtruar presion të veçantë mbi tregjet europiane të obligacioneve. Inflacioni në Eurozonë u përshpejtua në 3.3% në gusht, treguan të dhënat zyrtare të publikuara të martën, ndërsa çmimet e energjisë u rritën me 14.3%.
Mohit Kumar, kryeekonomist për Europën në Jefferies, tha se kompania e investimeve po reduktonte ekspozimin ndaj aktiveve më të rrezikshme pas rritjes së çmimeve të naftës.
Sipas Kumar, yield-et e obligacioneve po arrijnë në nivele ku një rritje e mëtejshme e tyre do të ishte gjithnjë e më negative si për tregjet e aksioneve, ashtu edhe për kreditimin.
Kontratat e të ardhmes që ndjekin indeksin S&P 500 sinjalizonin një tjetër rënie të mërkurën, duke iu shtuar humbjes prej më shumë se 1% të regjistruar deri në atë moment gjatë javës.
Japonia dhe Koreja e Jugut, dy prej importuesve më të mëdhenj të naftës, udhëhoqën rëniet në bursat aziatike. Indeksi Nikkei 225 ra me 3%, ndërsa Kospi humbi 3.8%./ Financial Times
Postimi ” Nafta prek 97 dollarë, gazi në Europë në nivelin më të lartë në tre vjet ” eshte marre nga Revista Monitor.
