Antonio Guterres, sekretari i përgjithshëm i Organizatës së Kombeve të Bashkuara theksoi se e vlerësonte marrëveshjen për të zgjatur në kohë nismën për eksportin e produkteve ukrainase nga Deti i Zi, për lehtësimin e lundrimit të sigurtë të eksportit të drithërave dhe produkteve ushqimore nga vendi. Gueterres tha se OKB-ja ishte gjithashtu plotësisht e përkushtuar për heqjen e pengesave të mbetura për eksportin e ushqimeve nga Federata Ruse – një pjesë e marrëveshjes që Moska e sheh si kritike.
Marrëveshja që lejon Ukrainën të eksportojë grurë përmes Detit të Zi pa pengesa, ishte planifikuar të anulohej të shtunën, 19 nëntor. Kjo marrëveshje e mbështetur nga OKB-ja më 22 korrik lejoi që dërgesat e grurit të rifillonin nga disa porte të Ukrainës në Detin e Zi, duke çuar në rreth 10 milionë ton dërgesa dhe duke ndihmuar në uljen e çmimeve ndërkombëtare.
Ukraina eksportonte nga deti, 5 deri në 6 milionë ton produkte bujqësore në muaj përpara se pushtimi rus në shkurt të bllokonte portet e Ukrainës. Një burim i Kombeve të Bashkuara tha se kishte arsye për të qenë optimistë për rinovimin e një marrëveshjeje për eksportin e drithërave nga Deti i Zi.
Rusia u shpreh në favor të zgjatjes së marrëveshjes së drithërave nga Deti i Zi në samitin e G20-ës të mërkurën, për sa kohë që më shumë grurë u dërgohej vendeve më në nevojë. Ukraina ka përcaktuar tashmë një plan për të eksportuar më shumë grurë në vendet e varfra. Kiev dëshiron të ushqejë të paktën 5 milionë njerëz të tjerë që përballen me mungesa akute ushqimore deri në fund të pranverës së ardhshme.
Pushtimi i Rusisë ndaj eksportuesit të madh të grurit, Ukrainës, rriti çmimet globale të produkteve kryesore në nivele rekord në fillim të këtij viti dhe agjencitë e Kombeve të Bashkuara kanë paralajmëruar për një përkeqësim të situatës ushqimore në vendet më të varfra.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
