Tregu i sigurimeve shlyen dëme prej 65 milionë eurosh në tetëmujorin e këtij viti

Tregu i sigurimeve në vend ka shënuar një rritje të dëmeve të paguara gjatë periudhës janar-gusht. Sipas të dhëna zyrtare të publikuara nga Autoriteti i Mbikëqyrjes Financiare (AMF), dëmet e paguara bruto arritën shifrën e 5.96 miliardë lekëve, ose afërsisht 65 milionë euro, duke u rritur me 9% krahasuar me të njëjtën periudhë të një viti më parë.

Zgjerimi i dëmeve është reflektuar në të dyja segmentet kryesore, si në atë të jetës ashtu edhe në jo-jetë. Në tregun e sigurimeve të jetës, dëmet e paguara bruto kapën vlerën e 262 milionë lekëve, duke regjistruar një rritje prej 14.7%. Ndërkohë, segmenti i jo-jetës, që përbën edhe pjesën më të madhe të tregut, shënoi dëme në vlerën e 5.51 miliardë lekëve, me një rritje prej 10.6% në raport me tetëmujorin e vitit të kaluar.

E vetmja ulje në këtë periudhë është shënuar te dëmet e paguara përmes Fondit të Kompensimit të Byrosë Shqiptare të Sigurimeve, të cilat ranë me 26.6% krahasuar me vitin e kaluar.

Struktura e dëmeve vijon të mbetet e lidhur ngushtë me primet dhe përqendrimin e lartë te sigurimet e detyrueshme motorike. Më shumë se 70% e dëmeve në tregun e jo-jetës i përkasin produkteve të sigurimit motorik për përgjegjësitë ndaj palëve të treta. Në këtë kategori, sigurimi i brendshëm motorik TPL kryeson me 3.36 miliardë lekë, ose rreth 61% të totalit të dëmeve të paguara, duke u rritur me 13%. Kartoni Jeshil përbën 8.9% të dëmeve, kurse Polica Kufitare zë një peshë prej 0.5%.

Sa i takon sigurimeve vullnetare, produkti motorik KASKO zë mbi 12% të dëmeve të paguara bruto, ndërsa sigurimi nga zjarri dhe fatkeqësitë natyrore përfaqëson më pak se 8% të totalit.

Në tregun e sigurimit të jetës, dëmet vijojnë të jenë të përqendruara te produkti Jeta e Debitorit, i cili zë gati gjysmën e totalit të dëmeve të paguara për periudhën. Ky produkt lidhet ngushtë me kreditë bankare, veçanërisht ato afatgjata për blerjen e pasurive të paluajtshme, për të cilat bankat kërkojnë mbrojtje me sigurim jete, ndërsa disa institucione e aplikojnë atë edhe për hua konsumatore sipas kushteve të caktuara.