Ambasada e Rumanisë në Shqipëri organizoi një pritje të ngrohtë për stafin e projektit “Tricolor.al”, një projekt i ideuar, projektuar dhe ndërtuar nga një grup miqsh nga Shqipëria, ish-studentë në Rumani, dhe qëllimi primar i këtij portali është të mbledhë bashkë dashamirës të Rumanisë në Shqipëri dhe dashamirës të Shqipërisë në Rumani” – informon Tricolor.al. Në aktivitetin e organizuar me përkujdesjen e veçantë të Zj. Patricia Răduț, drejtuese e Zyrës Ekonomike dhe të Tregtisë pranë Ambasadës së Rumanisë në Shqipëri, morën pjesë Sh.T.Z. Octavian Șerban, Ambasador i Rumanisë në Republikën e Shqipërisë, Konsulli i Ambasadës së Rumanisë, z. Alexandra Savu, dashamirës dhe intelektualë arumunë, rumunë dhe shqiptarë të cilët vlerësuan me nota pozitive projektin “Tricolor.al” dhe u treguan të gatshëm për të kontribuar në vazhdimësinë e projektit. Z. Enkelejd Çollaku, Kryetar i Shoqatës Kulturore “Arumunët e Shqipërisë”, i pranishëm në këtë eveniment në fjalën e tij gjatë evenimentit theksoi rëndësinë që ka bashkëpunimi mes projektit “Tricolor.al” dhe shoqatës që drejton në çuarjen përpara të vlerave, traditave dhe kulturës arumune dhe rumune në të gjithë komunitetin arumun dhe rumun në Shqipëri. Gjithashtu, z. Çollaku garantoi që bashkëpunimi mes shoqatës që ai drejton dhe projektit “Tricolor.al” do te jetë i menjëhershëm dhe i vazhdueshëm, duke ecur krah-për-krah me njëri-tjetrin për një mision dhe synim të përbashkët.
Ndërkohë që Ambasadori i Rumanisë në Shqipëri, Sh.K.Z. Octavian Șerban theksoi edhe një herë rolin e rëndësishëm që marrëdhëniet shqiptaro-rumune kanë pasur në historinë e të dyja shteteve, si dhe siguroi mbështetjen e Ambasadës dhe strukturave të saj në mbarëvajtjen dhe jetëgjatësinë e këtij projekti.
Në fjalën e saj, znj. Patricia Răduț u tregua shumë entuziaste për mundësitë që ky projekt ofron për të dyja shtetet, duke sjellë akoma më pranë informacionet e rëndësishme për udhëtarët dhe turistët, për studentët dhe bizneset e të dyja vendeve të cilat dëshirojnë dhe duhet të zgjerojnë akoma më shumë bashkëpunimet mes njëri-tjetrit. Dhe në kuadër të këtyre bashkëpunimeve, zonja Răduț njoftoi se në datë 27 Maj do të organizojë edhe një Forum Ekonomik në ambientet e Ambasadës së Rumanisë në Shqipëri ku do të marrin pjesë mbi 15 kompani prodhuese nga Rumania dhe disa dhjetëra biznese Shqiptare.
Prezantimi i projektit “Tricolor.al” në Ambasadën e Rumanisë në Shqipëri u drejtua nga Menaxheri i Projektit, Dr. Ferjolt Ozuni dhe u mbështet edhe nga pjesa tjetër e stafit të projektit: Elda Ozuni, Adri Softa, Niksmeralda Ozuni, Ilir Kostallari, Dea Duka, Gledisa Omeri dhe Jonian Omeri.
