Kompania franceze Akuo Energy SAS ka dalë me çmimin më të ulët në ankandin e parë konkurrues për energjinë e erës në Kosovë, pasi Ministria e Ekonomisë hapi ofertat financiare për projektin me kapacitet të synuar deri në 100 megavatë. Me këtë ofertë, kompania renditet si ofertuesja më e favorshme nga ana financiare për zhvillimin e projektit.
Ofertat fillestare në këtë proces ishin dorëzuar më 10 shtator 2026 nga tre kompani dhe konsorciume.
Rizvanolli: transparencë dhe konkurrencë e drejtë
Ministrja e Ekonomisë, Artane Rizvanolli, theksoi se procesi është realizuar me qëllim garantimin e transparencës, konkurrencës së drejtë dhe mbrojtjes së interesit publik. Sipas saj, energjia e erës do të ketë rol të rëndësishëm në diversifikimin e burimeve të prodhimit dhe në forcimin e sigurisë energjetike të Kosovës.
Në përgatitje ankandi për 200 MW
Ministria ka nisur gjithashtu përgatitjet për ankandin e radhës të energjisë së erës, me kapacitet deri në 200 MW, në bashkëpunim me Korporatën Financiare Ndërkombëtare (IFC). Ndërkohë, në shtator të këtij viti kanë hyrë në operim 70 MW kapacitete të reja të energjisë së erës.
Shtimi i kapaciteteve vendase të prodhimit ndihmon në zvogëlimin e varësisë nga importi i energjisë dhe të ekspozimit ndaj luhatjeve të çmimeve në tregjet ndërkombëtare, duke e forcuar kështu pavarësinë energjetike të vendit.