Siguria dhe mirëqenia e fëmijëve në internet është shqetësimi më i madh i shqiptarëve në lidhje me përdorimin e teknologjisë digjitale. Sipas raportit Balkan Barometer 2025, të publikuar nga Këshilli i Bashkëpunimit Rajonal (RCC), 50% e të anketuarve në Shqipëri e vendosin këtë temë në krye të listës, ndjeshëm më lart se në pjesën tjetër të rajonit.
Shifra shqiptare është 7 pikë përqindje mbi mesataren e Ballkanit Perëndimor, ku 43% e qytetarëve ndajnë të njëjtin shqetësim. Rritja e vazhdueshme e përdorimit të internetit dhe e mjeteve digjitale po sjell kështu edhe pyetje të reja mbi sigurinë, privatësinë dhe ndikimin që teknologjia ka në jetën e përditshme.
Krimet kibernetike në vendin e dytë
Pas sigurisë së fëmijëve renditen krimet në internet, si vjedhja e të dhënave personale ose e informacionit të kartave bankare. Për këtë rrezik shprehen të shqetësuar 39% e shqiptarëve, një nivel pothuajse i barabartë me mesataren rajonale prej 40%.
Ndryshe ndodh me sigurinë e pagesave online, ku Shqipëria qëndron nën nivelin e rajonit. Vetëm 21% e të anketuarve në vend e shohin këtë si problem, krahasuar me 26% në Ballkanin Perëndimor. Ndërkaq, 13% e shqiptarëve shqetësohen se nuk kanë aftësitë e duhura digjitale për ta përdorur teknologjinë në mënyrë aktive, po aq sa mesatarja rajonale.
Frikë e ulët nga inteligjenca artificiale
Edhe ankthi se inteligjenca artificiale mund të shkaktojë humbje të vendeve të punës mbetet relativisht i kufizuar në Shqipëri. Vetëm 6% e të anketuarve e përmendin këtë rrezik, ndërsa në Ballkanin Perëndimor përqindja arrin në 8%.
Shqiptarët, më pak të shqetësuarit në rajon
Një nga gjetjet më të veçanta të raportit lidhet me ata që nuk shohin asnjë arsye shqetësimi nga përhapja e internetit dhe e mjeteve digjitale. Në Shqipëri, kjo përgjigje u dha nga 30% e të anketuarve, kundrejt 22% në mesataren rajonale. Me këtë rezultat, Shqipëria ka përqindjen më të lartë në rajon të qytetarëve që deklarojnë se këto zhvillime nuk i shqetësojnë.
