Vetëm 4% e bizneseve shqiptare të përfshira në anketë kanë punësuar shtetas nga vendet e tjera të Ballkanit Perëndimor, ndërsa mesatarja rajonale arrin në 6%. Kjo del nga raporti "Balkan Barometer 2025", i publikuar nga Këshilli i Bashkëpunimit Rajonal, në një kohë kur mungesa e punonjësve mbetet ndër problemet më të mëdha të sipërmarrjeve në vend.
Pavarësisht vështirësive për të siguruar staf, rekrutimi nga ekonomitë fqinje vijon të jetë i ulët. Shifrat vënë në dukje një mospërputhje midis shqetësimit të bizneseve për fuqinë punëtore dhe shfrytëzimit real të tregut rajonal të punës. Gjithsesi, anketa nuk sqaron nëse kompanitë kanë provuar të punësojnë punonjës nga vendet përreth, as cilat pengesa mund të kenë ndeshur gjatë këtij procesi.
Renditja në rajon
Mali i Zi del në krye me 18% të bizneseve që kanë punësuar nga rajoni, një nivel 4.5 herë më i lartë se ai i Shqipërisë dhe tri herë më i lartë se mesatarja e Ballkanit Perëndimor. Renditja vijon kështu:
- Serbia: 5%
- Shqipëria: 4%
- Bosnje Hercegovina: 3%
- Maqedonia e Veriut: 2%
Mungesa e punonjësve si pengesë
Në nivel rajonal, bizneset e vlerësojnë mungesën e fuqisë punëtore si pengesë për zhvillimin e tyre me 6.8 pikë, në një shkallë nga 1 deri në 10. Të dhënat tregojnë se, edhe pse sigurimi i stafit mbetet shqetësim i madh, punësimi nga vendet fqinje mbetet relativisht i kufizuar. Duhet theksuar se statistikat nuk përfshijnë punonjësit e ardhur nga vende jashtë Ballkanit Perëndimor.
