Gjashtë vendet e Ballkanit Perëndimor po përfitojnë për të 13-in vit radhazi nga Procesi i Berlinit, nismë që këtë herë e zhvillon samitin e saj në Malin e Zi. Në takim marrin pjesë kancelari gjerman Friedrich Merz, kryeministri Edi Rama, Albin Kurti, si dhe kryeministrat e Kroacisë, Austrisë dhe Maqedonisë së Veriut, së bashku me Komisioneren e Zgjerimit, Marta Kos.

Nga nisma e Merkel te bashkëpunimi rajonal

Procesi i Berlinit u prezantua për herë të parë në vitin 2014 nga kancelarja gjermane Angela Merkel. Synimi i tij ishte forcimi i bashkëpunimit mes vendeve të Ballkanit Perëndimor dhe mbështetja e rrugës së tyre drejt anëtarësimit në Bashkimin Evropian.

Objektivat kryesore të nismës përfshinin përparimin në zbatimin e reformave, zgjidhjen e çështjeve dypalëshe dhe të brendshme ende të hapura, pajtimin brenda dhe ndërmjet shoqërive të rajonit, thellimin e bashkëpunimit ekonomik rajonal dhe krijimin e themeleve për një rritje të qëndrueshme.

Agjenda e ndërlidhjes u përqendrua në intensifikimin e shkëmbimeve mes njerëzve, si dhe në bashkëpunimin ekonomik dhe politik. Në këtë kuadër janë arritur marrëveshje dhe janë nisur projekte në transport dhe infrastrukturë, në bashkëpunimin mes të rinjve, si dhe mes bizneseve dhe shoqërisë civile të rajonit. Si pjesë e procesit u krijuan Zyra Rajonale e Bashkëpunimit Rinor (RYCO) dhe Forumi i Investimeve i Dhomave të Ballkanit Perëndimor (WBCIF).

Roaming dhe korridoret e gjelbra

Për Shqipërinë, ndër përfitimet më të prekshme janë krijimi i korridoreve të gjelbra dhe Marrëveshja Roaming. Kjo e fundit hyri në fuqi më 1 korrik 2021 dhe u lejon shtetasve shqiptarë që udhëtojnë në vendet e tjera të Ballkanit Perëndimor të përdorin minuta, SMS dhe internet me të njëjtat kushte si në Shqipëri, pa pasur nevojë të aktivizojnë paketa shtesë roaming.

Në samitin e korrikut 2021 u miratua në parim ideja e korridoreve të gjelbra ndërmjet Ballkanit Perëndimor dhe BE-së. Po aty u vendos të hartohet një marrëveshje roaming mes vendeve të rajonit dhe Bashkimit Evropian, me qëllim uljen e tarifave.

Mbështetje për projekte infrastrukturore

Shqipëria siguroi gjithashtu mbështetje për përgatitjen e pesë projekteve, ndër të cilat ndërhyrje në portin e Durrësit, bypass-i i Lezhës dhe projekti hidroenergjetik i Skavicës, krahas projekteve të tjera.