Raporti më i ri i Komisionit Evropian për zgjerimin tregon se vendet e Ballkanit Perëndimor po ecin me ritme shumë të ndryshme drejt Bashkimit Evropian. Ndërsa disa shtete i janë afruar fazës përmbyllëse të negociatave, të tjerët mbeten të ngecur për shkak të bllokadave politike dhe problemeve me sundimin e ligjit.
Mali i Zi dhe Shqipëria në krye
Mali i Zi mbetet lideri i procesit dhe ka si objektiv përmbylljen e negociatave të anëtarësimit brenda fundit të këtij viti. Sipas një afati orientues, traktati i anëtarësimit pritet të nënshkruhet në qershor 2027.
Shqipëria ka hapur të gjithë grupkapitujt negociues dhe deri tani ka mbyllur katër kapituj. Qëllimi i saj është të përfundojë negociatat deri në fund të vitit 2027, një synim që Komisioni e quan ambicioz, por të realizueshëm.
Vendet që ngecin
Maqedonia e Veriut vazhdon të jetë e bllokuar, pasi ndryshimet kushtetuese nuk janë miratuar. Komisioni shpreh gjithashtu shqetësim për ndikimin politik në sistemin e drejtësisë dhe për korrupsionin.
Serbia nuk ka bërë asnjë hap përpara në negociata. Raporti vë në dukje përkeqësimin e sundimit të ligjit, presionin mbi gjyqësorin dhe shoqërinë civile, si edhe harmonizimin e dobët me politikën e jashtme të BE-së.
Bosnje dhe Hercegovina përballet ende me bllokada politike dhe reforma të ngecura, të cilat i frenojnë rrugën drejt anëtarësimit.
Në përfundim, Komisioni nënvizon se shpejtësia e integrimit do të përcaktohet nga përparimi konkret në reforma, në sundimin e ligjit dhe në forcimin e institucioneve demokratike.
