Bashkimi Evropian u ka dhënë një përgjigje të qartë paralajmërimeve të Rusisë drejtuar vendeve të Ballkanit Perëndimor: vendi i tyre është në BE. Mesazhi vjen nga Brukseli pas deklaratës së zëdhënëses së Ministrisë së Jashtme ruse, Maria Zakharova, e cila nga mesi i këtij muaji u kishte bërë të ditur vendeve të rajonit se integrimi evropian nuk lidhet më vetëm me anëtarësimin, por kërkon edhe përqafimin e politikës së Brukselit ndaj Moskës.

Komisioni: Mbrojtja nga dezinformimi, pjesë e anëtarësimit

I pyetur se si mund t'i mbrojë vendet kandidate nga pasojat e këtyre paralajmërimeve, Komisioni Evropian u shpreh se "lufta kundër manipulimit të informacionit nga jashtë, dezinformimit dhe kërcënimeve të tjera hibride është pjesë përbërëse e procesit të anëtarësimit".

"Mbrojtja e procesit të integrimit evropian dhe e integritetit të mediave nga dezinformimi dhe manipulimi i informacionit nga jashtë është me rëndësi thelbësore", theksoi Komisioni Evropian në përgjigjen e dhënë për Radion Evropa e Lirë.

Një qëndrim i njohur rus

Për vendet e rajonit që po ecin drejt integrimit evropian dhe euroatlantik, mesazhe të tilla nga Moska nuk janë të reja. Prej vitesh, zyrtarët rusë kanë kritikuar zgjerimin e NATO-s dhe të BE-së në Ballkanin Perëndimor.

Tensioni më i fundit u shkaktua nga vendimi i Podgoricës për të shfuqizuar që nga nëntori regjimin pa viza për qytetarët rusë. Ambasada e Rusisë në Mal të Zi e quajti këtë vendim "veprim armiqësor". Sipas Ministrisë së Jashtme malazeze, mbi 80 për qind e qytetarëve të vendit e mbështesin anëtarësimin në BE.

Qëndrimet e vendeve të rajonit ndaj sanksioneve

  • Shqipëria, Maqedonia e Veriut dhe Kosova e kanë përafruar politikën e tyre të jashtme dhe të sigurisë me atë të BE-së, duke përfshirë sanksionet ndaj Rusisë pas pushtimit në shkallë të plotë të Ukrainës.
  • Bosnje e Hercegovina, për shkak të sistemit të saj kompleks të vendimmarrjes, nuk i zbaton plotësisht të gjitha vendimet e Brukselit.
  • Serbia mbetet i vetmi vend në rajon që nuk ka vendosur sanksione ndaj Moskës.

Pavarësisht këtyre dallimeve politike, Bashkimi Evropian vazhdon të jetë me diferencë partneri më i madh tregtar për të gjitha vendet e rajonit, përfshirë edhe Bosnjë e Hercegovinën dhe Serbinë.