Shqipëria rrezikon të humbasë rreth 15.7 për qind të Prodhimit të Brendshëm Bruto, ose afërsisht 3.5 miliardë euro, deri në vitin 2030 si pasojë e përmbytjeve, zjarreve dhe dëmeve në bujqësi. Ky është vlerësimi i raportit rajonal për Klimën dhe Zhvillimin në Vendet e Ballkanit Perëndimor të Bankës Botërore, sipas të cilit humbjet e parashikuara për Shqipërinë janë më të lartat në rajon.

Bujqësia, sektori më i goditur

Specialistët e fushës theksojnë se ndryshimet klimatike kanë ndryshuar edhe hartën tradicionale të kulturave bujqësore në vend:

“Deri dje dihej se ulliri kultivohej në një zonë të caktuar të vendit, por ndryshimet klimatike ka prishur ekuilibrat. Sot bujqësia është ajo e prekur nga ndryshimet klimatike. Gjithashtu zjarret, përmbytjet dhe energjia janë të tjerë fenomene negative që vijnë nga ndryshimet klimatike.”

Fatura e përshtatjes në rajon

Për të zbutur efektet e ndryshimeve klimatike, Banka Botërore llogarit se Shqipërisë i nevojiten 6 miliardë dollarë. Për krahasim, Serbisë i duhen 9.5 miliardë, Bosnje-Hercegovinës 6.8 miliardë dhe Maqedonisë së Veriut 6.4 miliardë.

“Këto 6 miliardë euro janë të domosdoshme për t’u përshtatur ndaj klimës. Do vijë një moment ku nuk do të mund të mitigojmë më ndryshimet. Duhet t’i paraprijmë duke u përshtatur.”

Sipas analizës së Bankës Botërore, investimet në përshtatjen ndaj klimës sjellin përfitime sociale dhe mjedisore që shkojnë përtej atyre ekonomike apo financiare. Këto përfitime të përbashkëta përfshijnë rritjen e eficiencës së energjisë, një bujqësi më të qëndrueshme dhe ruajtjen e diversitetit ekologjik.

“Shqipëria më shumë vuan efektet e të tjerëve se sa kontribuon te ndryshimet klimatike. Megjithatë, duke qenë pjesë e një zinxhiri edhe ne kontribuojmë në rregullimin e ekuilibrave të natyrës.”

Thatësira dhe politikat qeveritare

Edhe Banka Europiane për Rindërtim dhe Zhvillim, në raportin e saj të fundit mbi perspektivën ekonomike të vendeve në zhvillim, ka paralajmëruar se thatësira rrezikon të ngadalësojë rritjen ekonomike të Shqipërisë.

Në vitin 2021, qeveria miratoi një Plan të posaçëm për Energjinë dhe Klimën, ku theksohet nevoja për uljen e emetimeve të gazeve ndotëse në atmosferë dhe për shtimin e sipërfaqeve të gjelbra.