Banka Botërore parashikon se rritja ekonomike e Shqipërisë gjatë këtij viti do të shënojë një ngadalësim. Institucioni ndërkombëtar vlerëson se zgjerimi i Prodhimit të Brendshëm Bruto të vendit do të jetë në nivelin e 3.4 për qind, duke pësuar një ulje nga 3.7 për qind që ishte parashikimi i mëparshëm.
Ky rishikim në ulje vjen si pasojë e pasigurisë dhe e frikës për një krizë të mundshme të çmimeve në sektorin e energjisë. Kjo situatë mbart rrezikun që të përcillet në të gjitha hallkat e zinxhirit të furnizimit, duke prekur ekonomitë e rajonit.
Për shkak të këtyre sfidave, Banka Botërore ka ulur projeksionet e rritjes ekonomike për të gjitha vendet e Ballkanit Perëndimor. Në vlerësimin e paraqitur në raportin e pranverës 2026 për ekonomitë e rajonit, Kosova do të ketë rritjen më të lartë, e ndjekur nga Shqipëria dhe Maqedonia e Veriut, më pas Mali i Zi, ndërsa në vendet e fundit radhiten Serbia dhe Bosnje-Hercegovina.
