Banka qendrore thotë se nga viti i ardhshëm do të ndalojë uljen e nivelit të blerjeve mujore të obligacioneve.
Banka e Japonisë ka rritur normën afatshkurtër të politikës monetare në “rreth 1%”, duke e çuar koston e huamarrjes në nivelin më të lartë në 31 vjet, ndërsa vendi po përshtatet me inflacion të qëndrueshëm.
Rritja me 0.25 pikë përqindjeje, e cila pritej gjerësisht, e çon Japoninë në atë që analistët e cilësojnë si një moment kyç në përpjekjet e bankës qendrore për të normalizuar politikën monetare pas viteve me norma jashtëzakonisht të ulëta interesi dhe deflacion.
Norma e politikës monetare e Bankës së Japonisë kishte qenë për herë të fundit në nivelin 1% në vitin 1995, kur banka qendrore po ulte kostot e huamarrjes pas shpërthimit të flluskës së aseteve japoneze në fund të viteve 1980.
Në deklaratën që shoqëroi vendimin, Banka e Japonisë sinjalizoi se synon të vazhdojë procesin e normalizimit, duke rritur normën bazë të interesit dhe duke ulur shkallën e lehtësimit monetar “në varësi të zhvillimeve në aktivitetin ekonomik, çmimet dhe kushtet financiare”.
Banka e Japonisë tha gjithashtu se nga prilli 2027 do të ndalojë uljen e blerjeve mujore të obligacioneve qeveritare japoneze, duke i stabilizuar ato në rreth 2 trilionë jenë në muaj. Edhe kjo lëvizje pritej gjerësisht nga tregu.
Jeni mbeti i qëndrueshëm në rreth 160.2 jenë për dollar pas njoftimit.
Banka e Japonisë tha se, megjithëse çmimet më të larta të naftës bruto po rëndojnë mbi aktivitetin ekonomik, “rreziku i një ngadalësimi të ndjeshëm të ekonomisë duket se është ulur krahasuar me pak kohë më parë”.
Ajo vuri në dukje gjithashtu se kalimi i kostove më të larta të karburantit te çmimet po ecën relativisht shpejt dhe mund të përhapet nga transaksionet mes bizneseve, duke e shtyrë inflacionin bazë të konsumatorëve mbi objektivin prej 2%.
Që kur e nxori Japoninë nga normat negative të interesit në vitin 2024, Banka e Japonisë i rriti normat dy herë në vitin 2025. Pritet që ajo të ndjekë një model shtrëngimi gradual, rreth çdo gjashtë muaj. Disa ekonomistë besojnë se një tjetër rritje prej 0.25 pikë përqindjeje mund të vijë që në tetor.
Vendimi i kësaj jave për të rritur normat e interesit u mor me 7 vota pro dhe 1 kundër nga Komiteti i Politikës Monetare i bankës, i cili kishte mbetur me tetë anëtarë pasi guvernatori Kazuo Ueda u shtrua në spital javën e kaluar.
Anëtari kundërshtues, Toichiro Asada, argumentoi se situata në Lindjen e Mesme paraqiste për Japoninë rreziqe më të mëdha në kahun negativ për prodhimin dhe punësimin sesa rreziqe në kahun rritës për çmimet.
“Shpërndarja e votave është interesante dhe tregon se bordi tani është pak më i balancuar, ndërsa më parë anonte qartë nga qëndrimi më i ashpër monetar,” tha Stefan Angrick, drejtues për Japoninë në Moody’s Analytics.
“Fakti është gjithashtu se Banka e Japonisë nuk ka zgjedhje të mira,” shtoi ai. “Ajo mund të rrisë normat për të frenuar presionet inflacioniste duke forcuar jenin, por kjo do të dëmtonte ekonominë.”
Mbledhja e kësaj jave u drejtua nga një prej zëvendësguvernatorëve të Bankës së Japonisë, Ryozo Himino./ Financial Times
Postimi ” Banka e Japonisë rrit normat e interesit në 1% për herë të parë që nga viti 1995 ” eshte marre nga Revista Monitor.
