Banka e Shqipërisë: Depozitat janë të sigurta pavarësisht dëmtimeve në degë bankare dhe ATM

Banka e Shqipërisë ka dalë me një deklaratë për mediat, ku siguron qytetarët se dëmet e shkaktuara në infrastrukturën fizike të disa degëve bankare nuk e vënë në rrezik sigurinë e depozitave të klientëve, as qëndrueshmërinë financiare të bankave. Deklarata vjen pas zhvillimeve të ditëve të fundit gjatë protestës studentore në vend, ku janë regjistruar incidente ndaj disa degëve dhe bankomateve (ATM), me dëme materiale dhe kufizime të përkohshme të shërbimeve.

Kursimet të mbrojtura, pagesat pa ndërprerje

Banka Qendrore nënvizon se depozitat dhe kursimet e qytetarëve në sistemin bankar janë të sigurta. Sipas saj, qytetarët duhet të jenë të qetë, pasi kursimet e tyre janë të mbrojtura dhe nuk rrezikohen nga dëmtimet fizike të ambienteve.

Institucioni sqaron gjithashtu se shërbimi i pagesave ka vazhduar të funksionojë normalisht dhe pa asnjë ndërprerje. Kjo, sipas Bankës, garanton që sistemi bankar të vijojë rolin e tij si domosdoshmëri për aktivitetin ekonomik të bizneseve dhe për nevojat e konsumit të familjeve.

Siguria e punonjësve dhe klientëve si përparësi

Në këto rrethana, Banka e Shqipërisë thekson se siguria e qytetarëve, klientëve dhe punonjësve të institucioneve financiare mbetet përparësi. Kufizimet e përkohshme në disa degë lidhen pikërisht me nevojën për të mbrojtur sigurinë fizike të stafit dhe të klientëve.

Për këtë arsye, Banka fton qytetarët dhe bizneset të ndjekin njoftimet zyrtare të bankave përkatëse dhe të përdorin sa më shumë kanalet alternative të shërbimit bankar.

Bankat, shtyllë e ekonomisë

Në deklaratë theksohet se sistemi bankar është një shtyllë me rëndësi thelbësore për ekonominë dhe jetën e përditshme. Pas çdo dege, pagese apo transaksioni qëndrojnë familje që administrojnë kursimet, qytetarë që marrin pagat dhe pensionet, biznese që paguajnë punonjësit dhe vazhdojnë aktivitetin, si dhe sipërmarrje që investojnë e krijojnë vende pune. Sipas Bankës, funksionimi normal i bankave lidhet drejtpërdrejt me mirëqenien e qytetarëve, vazhdimësinë e aktivitetit ekonomik dhe besimin në të ardhmen.

Në përmbushje të misionit të saj, Banka e Shqipërisë u bën thirrje të gjithë qytetarëve që, teksa ushtrojnë të drejtën për protestë paqësore, të respektojnë dhe të mbrojnë sigurinë e Bankës së Shqipërisë, të institucioneve bankare, ambienteve, infrastrukturës dhe punonjësve të tyre. Sipas institucionit, ruajtja e këtyre institucioneve nënkupton ruajtjen e shërbimeve dhe funksioneve që u përkasin dhe u shërbejnë të gjithëve.