Banka Qendrore e Republikës së Kosovës (BQK) ka dorëzuar zyrtarisht aplikimin për anëtarësimin e vendit në Zonën e Vetme të Pagesave në Euro (SEPA), një hap që shënon përparim në integrimin financiar të Kosovës me Europën. Përfshirja në këtë hapësirë pritet t'u sjellë qytetarëve dhe bizneseve transferta ndërkufitare në euro më të lira, më të shpejta dhe me kushte më të favorshme.
Vite reformash ligjore dhe teknike
Aplikimi është rezultat i disa vitesh pune për harmonizimin e legjislacionit dhe rregulloreve vendase me standardet e Bashkimit Evropian, si dhe për modernizimin e infrastrukturës së pagesave. Në kuadër të këtij procesi janë ndryshuar:
- Ligji për Shërbimet e Pagesave;
- Ligji për Bankat;
- legjislacioni për parandalimin e pastrimit të parave dhe financimit të terrorizmit.
Paraprakisht, në tetor të vitit 2024 ishte dorëzuar një paraaplikim, i cili mundësoi konsultimet dhe vlerësimet me institucionet përkatëse evropiane. Procesi është mbështetur teknikisht nga Banka Botërore dhe është zhvilluar në bashkëpunim me institucione vendore e ndërkombëtare.
Pranimi nuk është automatik
Dorëzimi i dokumentacionit nuk do të thotë se Kosova pranohet automatikisht në SEPA. Aplikimi do të kalojë tani në një fazë shqyrtimi dhe vlerësimi nga autoritetet evropiane, të cilat do të verifikojnë nëse vendi i përmbush kërkesat ligjore dhe rregullative. Vetëm pas një vendimi pozitiv do të nisin procedurat për përfshirjen e bankave dhe institucioneve financiare kosovare në skemat përkatëse të pagesave.
Rëndësia për remitancat
Procesi ka peshë të veçantë për Kosovën, duke pasur parasysh lidhjet e ngushta ekonomike me vendet evropiane dhe rolin e remitancave në ekonomi. Synimi është lehtësimi i transfertave dhe forcimi i integrimit financiar me tregun e përbashkët evropian. BQK-ja synon që nëpërmjet këtij procesi të sigurojë përfitime afatgjata për qytetarët dhe bizneset, duke e afruar më tej sistemin financiar të vendit me standardet evropiane.
