Shqipëria ka përmbushur me sukses kushtet e nevojshme për mbylljen e negociatave për Kapitullin 20 të anëtarësimit në Bashkimin Evropian, i cili përqendrohet te politikat për sipërmarrjen dhe industrinë. Ky kapitull përfshin të gjitha rregullat dhe politikat që ndikojnë drejtpërdrejt te bizneset, investimet dhe zhvillimi i sektorëve të ndryshëm të ekonomisë kombëtare.

Në dokumentin zyrtar përkatës, Bashkimi Evropian konfirmon se vendi ka përmbushur kriterin e fundit për këtë kapitull. Megjithatë, ky hap nuk nënkupton përfundimin e plotë të detyrave. Vendi ynë duhet të vijojë procesin e përafrimit të legjislacionit me rregullat evropiane dhe të garantojë zbatimin e tyre efektiv në praktikë.

Një nga fushat më parësore mbetet mbështetja për bizneset e vogla dhe të mesme, të cilat përbëjnë shtyllën kurrizore të ekonomisë. Bashkimi Evropian vlerëson se Shqipëria është kryesisht e përafruar me politikat evropiane për këto ndërmarrje, por kërkon që masat e parashikuara të zbatohen plotësisht me qëllim rritjen e produktivitetit dhe lehtësimin e veprimtarisë së tyre tregtare.

Një tjetër çështje me rëndësi të veçantë lidhet me pagesat në kohë të faturave mes bizneseve. Shqipëria tashmë ka përafruar rregullat me ato evropiane për vonesat në pagesa, ndërsa tani kërkohet zbatimi i tyre në terren. Për kompanitë, ky aspekt është vendimtar për të shmangur vonesat në arkëtimin e fondeve dhe për të menaxhuar më mirë aktivitetin e tyre të përditshëm financiar.

Vëmendje e shtuar i kushtohet gjithashtu fushës së investimeve. Shqipëria ka detyrimin të përfundojë deri në fund të vitit ligjin për investimet strategjike dhe të miratojë një ligj të unifikuar për investimet, i cili duhet të jetë tërësisht në përputhje me standardet e Bashkimit Evropian. Ndërkohë, për sektorin e turizmit kërkohet një zhvillim më i qëndrueshëm, i shoqëruar me mbrojtje më të mirë të mjedisit dhe të trashëgimisë kulturore, si dhe me përfitime më të drejtpërdrejta për komunitetet vendase.

Bashkimi Evropian kërkon gjithashtu më shumë transparencë në procedurat e prokurimeve publike, shërbime publike plotësisht të digjitalizuara dhe masa më të forta kundër korrupsionit dhe ekonomisë informale. Mbyllja e Kapitullit 20 shënon arritjen e një tjetër etape në procesin e negociatave të anëtarësimit, por Shqipëria do të vazhdojë të monitorohet rreptësisht për mënyrën se si i zbaton rregullat evropiane në praktikë.

Me këtë zhvillim, shkon në katër numri i kapitujve për të cilat Shqipëria ka mbyllur negociatat, ndërsa i mbeten edhe 29 kapituj të tjerë për t'u mbyllur brenda afatit kohor të përcaktuar nga vendi ynë dhe Bashkimi Evropian, i cili është viti 2027.