12.5 C
Tirana
E premte, 1 Mars 2024

Beteja e Cloud po ashpërsohet

Duhen Lexuar

Sa para keni shpenzuar sot në Cloud? Robert Hodges mund ta zbulojë këtë me vetëm disa klikime. Ai tregon një panel në një kompjuter në zyrën e tij në Berkeley, Kaliforni, ku janë të afishuara në kohë reale shpenzimet Cloud të firmës së tij, Altinity. Cloud përbën gjysmën e kostove totale të Altinity.

Paneli kompjuterik i zotit Hodges është një dritare drejt së ardhmes. Ndërkohë që shpenzimet po rriten, çdo firmë duhet të dijë jo vetëm përfitimet e Cloud, por edhe kostot e saj. Gartner, një kompani konsulence, llogarit se shpenzimet për shërbimet publike në Cloud, do të arrijnë në gati 10% të shpenzimeve totale të korporatave teknologjike në vitin 2021, nga rreth 4% në vitin 2017.

Shumë firma teknologjike startup shpenzojnë 80% të të ardhurave të tyre për shërbimet Cloud, sipas Sarah Wang dhe Martin Casado nga firma Andreessen Horowitz. Situata mund të krahasohet me një shekull më parë, kur energjia elektrike u bë një kontribut thelbësor (dhe nxiti disa firma të punësonin një lloj tjetër CEO: shefin e energjisë elektrike).

Për kompanitë Cloud, kjo ka qenë një gjë e mirë. Gjigantët e industrisë, si Amazon Web Services (AWS), Microsoft Azure, Google Cloud Platform (GCP) dhe kompanitë kineze Alibaba dhe Tencent, kanë rritur biznesin me shpejtësi. Gartner parashikon që shitjet globale të shërbimeve Cloud të rriten me 26% në vitin 2021, duke arritur në më shumë se 400 miliardë dollarë. Por konkurrenca po rritet.

Më 9 dhjetor, Oracle, prodhues i madh softuerësh, raportoi të ardhura më të larta se parashikimet, kryesisht falë rritjes së shpejtë të njësisë së tij Cloud. Vlera e kompanisë në treg u rrit me mbi 15%, ose gati 40 miliardë dollarë. Dhe po krijohen një sërë kompanish për t’i ndihmuar bizneset të menaxhojnë ngarkesat e tyre kompjuterike. Një firmë e tillë, me emrin Snowflake, vlen 108 miliardë dollarë. Një kompani tjetër, HashiCorp, tani ka një vlerë prej 15 miliardë dollarësh, pasi u regjistrua në Bursën e Nju Jorkut më 8 dhjetor.

Tendencat

Tendencat që nxitën formimin e Cloud dolën në pah gjatë konferencës Re:Invent, që është konferenca më e madhe në botë e Cloud, e cila mbahet çdo vit në Las Vegas nga AWS. Panelet që diskutonin mbi “optimizimin e kostove” dhe “faturimin e AWS” ishin ndër më të pranishmit. Pas konferencës, u mbajt edhe një ekspozitë e firmave të ndryshme startup, si CloudFix, Cloudwiry dhe Zesty, që i ndihmojnë klientët të menaxhojnë përdorimin e Cloud të tyre kompjuterike.

Arsyeja kryesore pse bizneset përdorin Cloud, nuk ka të bëjë me kostot, por me “fleksibilitetin”: pra, aksesin në burime shtesë kompjuterike me vetëm disa klikime. Por faturat e Cloud janë bërë gjithnjë e më të komplikuara dhe më të larta, duke rivalizuar ndonjëherë edhe shpenzimet famëkeqe të kujdesit shëndetësor në Amerikë.

Fatura që cakton AWS për kostot, qoftë edhe nga një klient i vogël si firma e konsulencës Duckbill Group, mund të arrijë në më shumë se 30 faqe, duke renditur në hollësi koston e çdo shërbimi që firma ka përdorur, duke filluar nga frekuencat online në Indi (0,01 dollarë për kërkesë në faqen zyrtare) deri tek një server virtual në Oregon (83,59 dollarë për softuerin “Amazon Elastic Compute Cloud”).

Kjo është krejt e natyrshme, thotë Corey Quinn, bashkëthemelues i Grupit Duckbill. Ofruesit e mëdhenj të Cloud komjuterike, si AWS, Azure dhe GCP, bashkojnë me dhjetëra shërbime. AWS shet më shumë se 200, duke filluar nga ruajtja e thjeshtë dhe shtypja e të dhënave, deri te bazat e të dhënave të specializuara dhe ofertat e Inteligjencës Artificiale. Çdo shërbim faturohet sipas dimensioneve të shumta, duke përfshirë numrin e serverëve, kohën e përdorur ose byte-t e transferuara. Më pas mund të bëhen ulje ose oferta speciale.

Zonja Wang dhe zoti Casado kanë këshilluar që firmat të mendojnë për të ndërtuar Cloud private për të ulur kostot. Deri tani, pak firma e kanë bërë një zgjedhje të tillë, që do të ishte më e kushtueshme dhe do ta bënte më të vështirë që bizneset të gëzonin përfitimet e burimeve kompjuterike që janë të pakufizuara në një Cloud publike. Në fakt, bizneset po përpiqen të profesionalizojnë “operacionet e tyre financiare në Cloud” (ose Fin Ops), për shembull, duke lidhur bonuset e drejtuesve që janë përgjegjës për përdorimin e Cloud, me kontrollin e kostove.

Për momentin, vlerësimi i ndikimit financiar të Cloud është një proces i mundimshëm. Ndërsa përdorimi i Cloud po rritet, ai duhet të automatizohet, thotë Lydia Leong, nga firma Gartner. Ndërkohë, një sërë kompanish startup po ofrojnë mjete dhe softuerë për të vlerësuar përdorimin e Cloud dhe këshilla për të minimizuar kostot. Firma CloudFix, që operon në Las Vegas, u ofron klientëve një softuer që optimizon performancën e tyre në Cloud.

Kompanitë e mëdha Cloud po marrin parasysh, si fillimet, ashtu edhe ankesat në rritje të klientëve. Për shembull, AWS, së fundmi njoftoi se do të ulte tarifat për transferimet e të dhënave online, duke ulur faturat për miliona klientë. Ajo gjithashtu i ndihmon ata të kursejnë më tepër, për shembull duke ofruar një “llogaritës të thjeshtë mujor” (megjithëse në fakt llogaritësi duket tepër i ndërlikuar).

Në Microsoft, kostot e Cloud shpesh përfshihen në “marrëveshjet e sipërmarrjes”, që janë abonime gjithëpërfshirëse ku zakonisht regjistrohen kompanitë e mëdha. Ndërsa GCP, “beson” në “multi-cloud”. Ajo synon t’u mundësojë klientëve të zgjedhin shërbimet më të mira dhe më të lira të Cloud, nga ofrues të ndryshëm (duke e bërë më të lehtë që ata të zgjedhin Google).

E kushtueshme, por mund të bëhen ulje

Megjithatë, kompanitë e mëdha nuk po ua lehtësojnë punën klientëve. I gjithë synimi i Cloud, është që klientët të paguajnë vetëm për shërbimin IT që përdorin, ndërsa kombinohen shërbime të ndryshme sipas nevojës. AWS e sheh kompleksitetin si një avantazh konkurrues.

Asortimenti i saj i shërbimeve krijohet kryesisht nga ekipe të pavarura, që mund të rrisin inovacionin (përfshirë ndryshimin e mënyrës se si tarifohen klientët). “Ne vendosëm t’i lejojmë zhvilluesit tanë që të ndërtojnë atë që mendojnë se është më e mirë dhe të çlirojnë krijimtarinë e tyre”, thotë Matt Garman, drejtori i shitjeve dhe marketingut në AWS.

Tre ofruesit më të mëdhenj të Cloud, gjithashtu e kanë zakon që ta bëjnë të lirë dhe të lehtë transferimin e të dhënave në Cloud-et e tyre, por të kushtueshme që të dhënat të zhvendosen prej andej. Kritikët e akuzojnë AWS, Azure dhe GCP, se janë kthyer në versionin dixhital të “Hotel California”, që mund ta vizitosh sa herë të duash, por nuk mund të largohesh kurrë prej andej.

Nëse klientët bllokohen në këtë mënyrë, ata mund të kërkojnë të përdorin shërbime të tjera. Zoti Garman nuk e pranon idenë se çmimi më i lartë i zhvendosjes së të dhënave nga një Cloud, reflekton kostot më të larta të këtij veprimi. Në shumicën e rasteve, klientët largohen me më shumë të dhëna sesa kanë hyrë.

Sidoqoftë e vërteta, marzhet e larta të fitimit bruto të ofruesve të Cloud, (më shumë se 60% në rastin e AWS), po tërheqin konkurrencë. Në shtator, Cloudflare, e cila i ndihmon klientët të krijojnë përmbajtje online dhe të shmangin sulmet dixhitale, krijoi një shërbim të ri të ruajtjes së të dhënave që nuk tarifon për daljet dixhitale. Matthew Prince, shefi i Cloudflare, thotë se kjo duhet “të zhbllokojë potencialin e vërtetë të Cloud kompjuterike”, duke i lejuar bizneset të ndërthurin dhe të përputhin shërbimet nga ofrues të ndryshëm.

“Çdo ofrues i Cloud-eve kompjuterike, ka pika të ndryshme të forta dhe të dobëta”, thotë zoti Prince. Investitorët ende mund t’i shquajnë pikat e forta të CloudFlare: megjithëse pati një rrëshqitje kohët e fundit, vlera e kompanisë në treg prej 45 miliardë dollarësh, është tetë herë më e lartë se në shtator 2019.

Nëse parashikimet e zotit Prince janë të sakta, industria do të bëhet më konkurruese. Për sa i përket firmës Altinity, paneli i saj kompjuterik është një rezultat i vetë produktit të saj – një bazë të dhënash e bazuar në Cloud kompjuterike, që i lejon përdoruesit të analizojnë informacionin, përfshirë edhe faturat, në kohë reale. Firma po shqyrton si mundësi të ofrojë kode për panelin e kontrollit, në mënyrë që çdokush të mund ta përdorë dhe ta përshtasë atë, sipas dëshirës. Duket se do të ketë sukses.

Burimi:Monitor
- Reklama -
spot_img
- Reklama -

Artikujt e Fundit