Bordi i Transparencës ka përcaktuar çmimet e reja të shitjes me pakicë dhe shumicë për nënproduktet e karburanteve, të cilat kanë hyrë në fuqi ditën e sotme, më 14 tetor, duke filluar nga ora 14:00.
Sipas vendimit të fundit, çmimi i shitjes me pakicë i gazoilit të standardit SSH EN 590 do të jetë jo më shumë se 213 lekë për litër, ndërsa çmimi i shitjes me shumicë është caktuar jo më shumë se 201 lekë për litër.
Ndërkohë, për nënproduktin e benzinës të standardit SSH EN, çmimi i shitjes me pakicë nuk do të kalojë 190 lekë për litër, kurse shitja me shumicë do të jetë jo më shumë se 178 lekë për litër.
Këto çmime të miratuara nga Bordi do të mbeten në fuqi deri në mbledhjen e radhës, ku do të reflektohen lëvizjet e mundshme të çmimeve në tregjet ndërkombëtare.
Institucioni u ka bërë thirrje të gjithë operatorëve ekonomikë të shitjes me shumicë dhe pakicë që të respektojnë detyrimet e vendosura. Në rast se do të konstatohen shkelje, autoritetet paralajmërojnë pezullim të menjëhershëm të aktivitetit.
Ministria e Ekonomisë dhe Inovacionit, së bashku me Ministrinë e Financave dhe Ministrinë e Infrastrukturës dhe Energjisë, mbeten të angazhuara në mbrojtjen e konsumatorëve dhe garantimin e konkurrencës së ndershme.
