Bordi i Transparencës ka përcaktuar nivelet e reja maksimale për tregtimin e karburanteve me pakicë dhe shumicë në vend. Sipas vendimit më të fundit, çmimi i shitjes me pakicë i naftës shënon një shtrenjtim prej 7 lekësh për litër, duke arritur në 217 lekë nga niveli i mëparshëm prej 210 lekësh.
Paralelisht me gazoilin, rritje ka pësuar edhe benzina, e cila është shtrenjtuar me 3 lekë për litër dhe do të tregtohet me një tavan prej 193 lekësh për konsumatorët fundorë. Tarifat e reja bëhen efektive duke filluar nga mesdita e datës 8 tetor.
Çmimet për tregtimin me pakicë dhe shumicë
Përveç tregut me pakicë, struktura përcakton edhe nivelet maksimale për shitësit e mëdhenj. Sipas njoftimit zyrtar:
- Gazoili i standardit SSH EN 590 do të shitet me jo më shumë se 217 lekë për litër me pakicë dhe 205 lekë për litër me shumicë.
- Benzina e standardit SSH EN do të tregtohet me pakicë jo më shumë se 193 lekë për litër, ndërsa tavani për shitjen me shumicë është vendosur në 181 lekë për litër.
Paralajmërimi për operatorët e tregut
Bordi ka theksuar detyrimin që kanë të gjitha pikat e tregtimit dhe distributorët me shumicë për të zbatuar menjëherë këto çmime. Në rast të mosrespektimit të vendimit, paralajmërohet se masat ndëshkuese do të përfshijnë deri në pezullim të aktivitetit tregtar.
Këto përcaktime mbështeten në vendimin e Këshillit të Ministrave për shpalljen e gjendjes së veçantë në tregun e hidrokarbureve, si dhe në aktet ligjore që rregullojnë përpunimin, transportin dhe shitjen e naftës, gazit dhe nënprodukteve të tyre.
