Nëse udhëtimet drejt Belgjikës shpesh fokusohen te Brukseli apo Brugges, Antverpi mbetet një perlë e fshehur që shfaqet me një hijeshi diskrete. Ky qytet ofron mundësinë për të përjetuar jetën belge në ritmin e banorëve vendas, mes tregjeve të hapura, aperitivëve pasdite dhe takimeve të ngrohta shoqërore. Me një popullsi prej pak më shumë se 500 mijë banorësh, Antverpi është mjaft kompakt për t'u eksploruar në këmbë ose përmes biçikletës brenda një fundjave të vetme.
Pika e nisjes për çdo vizitor është Stacioni Qendror, një kryevepër neobaroke e ndërtuar me mermer dhe gur, e njohur nga vendasit si “Katedralja e Hekurudhave”. Historia e qytetit është e lidhur ngushtë me tregtinë detare. Që në shekullin XVI, Antverpi u shndërrua në një nga qendrat ekonomike më të rëndësishme të Europës, duke inauguruar në vitin 1531 ndërtesën e parë në botë të projektuar enkas për aktivitetin e bursës. Sheshi historik Grote Markt mbetet dëshmia më e gjallë e kësaj epoke të artë, me bashkinë e vjetër dhe banesat tradicionale të tregtarëve.
Kultura dhe arti zënë një vend qendror në jetën e qytetit. Muzeu Plantin-Moretus, një shtëpi historike e pionierëve të shtypshkronjës, po përgatitet për një rihapje pas restaurimit në muajin dhjetor. Ndërkohë, muzeu i modës MoMu kremton këtë vit katër dekada nga sukseset ndërkombëtare të “Gjashtëshes së Antverpit”, grupim ku bënin pjesë emra si Ann Demeulemeester dhe Dries Van Noten. Në lagjen Zuid, Muzeu Mbretëror i Arteve të Bukura mban një koleksion të pasur, duke përfshirë veprat madhështore të Rubensit, si “Madona në fron”, punimet e Anthony van Dyck dhe krijime të shekullit XX nga artistë si Jean-Michel Basquiat.
Gastronomia në Antverp është një përvojë më vete. Në lagjen Zuid, vizitorët mund të gjejnë bare verërash natyrale si Spiridon, apo restorante që gatuajnë me zjarr të hapur, siç është Eldo. Për ata që kërkojnë pjata tradicionale flamande, si mishi i gatuar ngadalë me birrë e mustardë (stoofvlees), Borze Café është një ndalesë e detyrueshme, e pasuar nga ëmbëlsira klasike dame blanche. Transformimi urban është gjithashtu i dukshëm: Groen Kwartier, dikur një spital ushtarak i shekullit XIX, është shndërruar në një zonë të gjallë ku kompleksi Pakt ofron kafene e mikrobirrari. Për më tepër, birraria historike De Koninck mirëpret vizitorët me furrën e bukës, dyqanet e djathit dhe punishtet e çokollatës.
Në veri të qytetit, zona e portit Eilandje shfaq fytyrën moderne. Selia e autoritetit portual, e projektuar nga arkitektja e ndjerë Zaha Hadid, qëndron mbi një ish-stacion zjarrfikësish të viteve 1920. Forma e saj si diamant simbolizon industrinë e njohur të gurëve të çmuar në Antverp. Ngjitur me të, muzeu Museum aan de Stroom ofron një pasqyrë mbi historinë e qytetit, ushqimit dhe tregtisë, ndërsa nga tarraca e tij mund të vëzhgohet aktiviteti intensiv i portit të dytë më të madh në Europë. Zhvillimi vazhdon edhe në Nieuw Zuid, një lagje e re buzë lumit Scheldt, ku arkitektë të njohur si David Chipperfield dhe Shigeru Ban kanë lënë gjurmët e tyre mbi zonën ku më parë operonte logjistika hekurudhore.