Inteligjenca artificiale po shndërrohet me shpejtësi në pikënisjen kryesore për kërkimin, planifikimin dhe rezervimin e udhëtimeve. Për t’iu përgjigjur këtij transformimi të tregut, Booking Holdings ka vendosur të bashkojë shërbimet e dy platformave të saj kryesore, Booking.com dhe Agoda, duke krijuar një njësi të re të dedikuar për partnerët e biznesit.

Njësia e re, e pagëzuar me emrin Booking Partner Division, do të nisë zyrtarisht punën në muajin janar. Ajo ka për qëllim t'u mundësojë bankave, linjave ajrore dhe agjencive online të udhëtimit që të ofrojnë shërbime rezervimi nën markën e tyre, por të mbështetura nga teknologjia e avancuar e Booking. Gjithashtu, grupi ka në plan t'u sigurojë partnerëve një asistent të posaçëm me inteligjencë artificiale, i specializuar posaçërisht për sektorin e udhëtimeve.

Divizioni i ri do të formohet nga bashkimi i Booking.com Strategic Partnerships me Rocket Travel by Agoda. Drejtimi i kësaj njësie i është besuar drejtorit ekzekutiv të Agoda-s, Omri Morgenshtern. Përmes kësaj platforme, partnerët do të kenë mundësi të integrojnë ofertën globale të Booking në aplikacionet e tyre, ose të pëfrytëzojnë infrastrukturën ekzistuese për të kryer rezervime nën emrin e tyre. Njësia gjithashtu do të menaxhojë shpërndarjen e tarifave për zinxhirët e ndryshëm hotelierë përmes rrjetit të partnerëve.

Sipas të dhënave nga Booking Holdings, portofoli i ofertës përfshin mbi 4,7 milionë prona, rreth 33 milionë listime akomodimi, më shumë se 500 linja ajrore dhe mbi 200 kompani të makinave me qira. Omri Morgenshtern theksoi se bashkimi i ekipeve të shitjeve dhe zhvillimit të produkteve do të ndihmojë grupin jo vetëm të përmirësojë cilësinë e shërbimeve për partnerët ekzistues, por edhe të tërheqë të rinj, duke e vlerësuar tregun potencial në një shifër mbresëlënëse prej 2 trilionë dollarësh. Megjithatë, Booking Holdings ende nuk ka bërë publike parashikimet se sa pritet të kontribuojë ky divizion i ri në të ardhurat dhe fitimin e përgjithshëm të grupit.

Lëvizje të ngjashme janë ndërmarrë edhe nga konkurrentët. Rivalja e madhe Expedia Group nisi që në vitin 2022 t'u ofronte teknologjinë e saj partnerëve të interesuar për të shtuar opsionet e rezervimit të udhëtimeve në platformat e tyre. Gjatë periudhës 2018–2023, të ardhurat e segmentit të shitjeve për bizneset (B2B) tek Expedia u rritën mesatarisht me 16% në vit, ndërsa fitimi para interesave, taksave, zhvlerësimeve dhe amortizimeve (EBITDA) i rregulluar u rrit me 28% në vit. Vetëm në vitin 2025, të ardhurat e këtij segmenti shënuan një rritje prej 18%, duke arritur në 4,8 miliardë dollarë, ndërsa EBITDA e rregulluar u rrit me 22%, në 1,26 miliardë dollarë, duke siguruar rreth një të tretën e të ardhurave totale dhe mbi një të tretën e EBITDA-së së rregulluar të grupit.

Agjencitë online të udhëtimit po përballen me presion të shtuar gjatë këtij viti, ndërsa investitorët analizojnë ndikimin afatgjatë të inteligjencës artificiale në mënyrën se si përdoruesit kërkojnë dhe rezervojnë udhëtimet. Prania në platformat e inteligjencës artificiale po kthehet në një domosdoshmëri për hotelet dhe ofruesit e aktiviteteve turistike, pasi udhëtarët po mbështeten tek këto mjete që në fazat e para të planifikimit. Drejtori ekzekutiv i Disney-t, Josh D’Amaro, konfirmoi se vizitorët tashmë i përdorin këto mjete për të zbuluar dhe planifikuar udhëtime drejt destinacioneve të Disney-t, ndërsa kompania po shikon mundësinë që klientët të rezervojnë drejtpërdrejt nga këto platforma.

Booking synon t'u ofrojë partnerëve një asistent me inteligjencë artificiale për udhëtimet, duke shfrytëzuar ekspertizën e kompanisë për të mbajtur të ulëta kostot e përpunimit të kërkesave. Sipas Morgenshtern, ky asistent duhet të jetë i aftë të përballojë flukse të larta kërkesash në situata emergjente, siç janë ndërprerjet e udhëtimeve kur një numër i madh klientësh kërkojnë ndihmë në të njëjtën kohë.