Jensen Huang, bashkëthemeluesi dhe drejtuesi ekzekutiv i Nvidia, është larguar me efekt të menjëhershëm nga kompania që ai e ktheu në një gjigant me vlerë rreth 4 trilionë dollarë. Dorëheqja vjen pas një skandali që lidhet me marrëdhënie jashtëmartesore dhe me dyshime për lidhje me spiunazhin kinez, pretendime këto që deri tani nuk janë provuar. Lajmi tronditi tregjet: aksionet e Nvidia humbën mbi 10% në tregtimin para hapjes së bursës të enjten, ndërkohë që titulli kishte rënë tashmë me më shumë se 20% gjatë muajit të fundit.

Sipas njoftimit zyrtar të kompanisë, drejtimin e përkohshëm e merr drejtoresha financiare, Colette Kress, e cila do të qëndrojë në krye deri në përzgjedhjen e një drejtuesi të ri. Ndërkohë, Harvey C. Jones, ish-drejtues i Synopsys, do të bëhet kryetari i parë i bordit të Nvidia.

Nga ngjitja historike te rënia

Huang, 63 vjeç, konsiderohej si një nga figurat kyçe të teknologjisë në nivel global. Në vitin 1993 ai bashkëthemeloi Nvidia dhe gradualisht e shndërroi atë nga një prodhues procesorësh grafikë për videolojëra në kompaninë që sot dominon tregun e çipave për inteligjencën artificiale.

Karriera e tij u vu në pikëpyetje pasi u bënë publike informacione për një marrëdhënie jashtëmartesore me Alice Huang, një sipërmarrëse e lidhur me kompaninë Megaspeed, e cila është kliente e Nvidia. Sipas raportimeve të Financial Times, zyrtarë të inteligjencës amerikane dyshojnë se ajo mund të ketë lidhje me shërbimet sekrete kineze.

Të dielën, Huang pranoi publikisht se kishte qenë i pabesë ndaj bashkëshortes, por mohoi çdo komprometim të sigurisë kombëtare të SHBA-së apo të sekreteve tregtare të Nvidia. Situata u rëndua më tej kur The New York Times raportoi për një marrëdhënie tjetër jashtëmartesore, këtë herë me Kimberly Powell, zëvendëspresidente e sektorit të kujdesit shëndetësor në Nvidia, e cila raportonte drejtpërdrejt te Huang.

Për të hetuar pretendimet që lidhen me inteligjencën kineze, bordi i kompanisë ka angazhuar firmën ligjore Wachtell Lipton. Nën vëmendje janë gjithashtu dyshimet për anashkalimin e kontrolleve amerikane të eksportit përmes kompanive me seli në Singapor dhe Malajzi. Theksohet se pretendimet për spiunazh dhe shkelje të sigurisë nuk janë vërtetuar.

Pasiguri për liderin e çipave të AI

Largimi i Huang hap pikëpyetje serioze për të ardhmen e Nvidia, një nga fituesit kryesorë të bumit të inteligjencës artificiale që nisi pas lançimit të ChatGPT në fund të vitit 2022. Që prej asaj kohe, aksionet e kompanisë janë rritur rreth 14 herë, edhe pse kohët e fundit kanë pësuar korrigjim. Nvidia është bërë furnizuesi kryesor i procesorëve të avancuar për zhvillimin e modeleve të inteligjencës artificiale, ndërsa Huang u shndërrua në një nga zërat më me peshë të industrisë.

Analistët paralajmërojnë për pasoja të ndjeshme. Banka e investimeve Bernstein e përgjysmoi objektivin e çmimit për aksionet e Nvidia, nga 400 në 200 dollarë.

“Jensen është Nvidia. Ai është vizionari”

u shpreh Stacy Rasgon, analist i lartë në Bernstein. Ai nënvizoi se suksesi aktual i kompanisë bazohet në vendimet strategjike që Huang mori një dekadë më parë dhe se mbetet e paqartë se kush do të mund të marrë vendimet e duhura për dhjetë vitet në vijim.

Dimensioni politik

Kriza ka edhe një anë politike. Huang kishte ndërtuar marrëdhënie të ngushta me Presidentin amerikan Donald Trump dhe kishte ndikuar në politikat e SHBA-së për inteligjencën artificiale, sidomos sa i përket eksporteve të çipave drejt Kinës.

Pasojat e largimit të tij mund të shtrihen përtej vetë Nvidia, duke prekur ekosistemin global të inteligjencës artificiale, ku kompania vepron njëkohësisht si furnizuese teknologjie, investitore dhe financuese e shumë sipërmarrjeve.

“Ai është zoti i inteligjencës artificiale. Flet në emër të industrisë”

deklaroi Jeff Christian, drejtues i firmës së rekrutimit të ekzekutivëve Christian and Timbers.