Projektbuxheti i vitit të ardhshëm synon të lehtësojë barrën financiare për familjet shqiptare nëpërmjet një sërë nismash fiskale dhe sociale. Sipas ministrit të Financave, Petrit Malaj, ky objektiv do të arrihet përmes reduktimit të TVSH-së për produktet e shportës, lehtësirave në strehim, si dhe rritjes së mbështetjes për pensionistët dhe kategoritë në nevojë.
Duke folur për skemën e pensioneve, ministri vuri në dukje se gjatë vitit të ardhshëm është parashikuar indeksimi i tyre, duke u zhvendosur në muajin prill, si dhe dyfishimi i bonusit mujor për pensionistët. Po ashtu, janë përfshirë politika mbështetëse për fëmijët me aftësi të kufizuara dhe studentët që vijnë nga familjet në nevojë.
Ministri Malaj bëri të ditur se paketa e re e masave sociale pritet të japë efektet e para në fillim të vitit që vjen. “Planifikimi ynë është që kjo ulje e produkteve të shportës të hyjë në fuqi që nga data 1 janar 2027”, theksoi ai.
Për sa i përket financimit të jashtëm, Shqipëria planifikon të dalë në tregjet ndërkombëtare gjatë vitit të ardhshëm për të siguruar një eurobond. Nëse kushtet e tregut do të jenë të favorshme, kjo do të jetë huaja e tetë e lëvruar që nga viti 2010. Vlera e parashikuar e këtij instrumenti financimi llogaritet në 650 milionë euro. Sipas qeverisë, këto fonde do të përdoren si për mbështetjen e buxhetit, ashtu edhe për shlyerjen e detyrimeve apo kredive ekzistuese që maturohen gjatë vitit.
Teksa projektbuxheti ka kaluar tashmë në parim në Kuvend, ministri i Financave pranoi se deri në votimin përfundimtar mund të ketë ndryshime të mundshme, të bazuara te kërkesat e institucioneve të ndryshme për fonde shtesë ose staf shtesë.