Qeveria parashikon të arkëtojë rreth 2 miliardë lekë nga licencimi i kompanive të basteve sportive online, sipas projektbuxhetit të vitit të ardhshëm, në të cilin të ardhurat totale të shtetit tejkalojnë 907 miliardë lekë. Kjo shumë pritet t’u shtohet të ardhurave nga tatimet, doganat dhe burimet e tjera tradicionale.
Megjithatë, relacioni që shoqëron projektligjin paralajmëron se shuma mund të mos realizohet nëse veprimtaria nuk fillon. Në dokumentin e të ardhurave dhe shpenzimeve të dorëzuar në Kuvend, qeveria pranon se në vitin 2026 nuk u arrit të mblidheshin 2 miliardë lekët e parashikuar, sepse licencat nuk u hapën.
Rregullat e reja për lojtarët
Sipas ndryshimeve ligjore të miratuara, qytetarët që duan të luajnë baste sportive online do të jenë të detyruar të regjistrohen me kartën e identitetit në faqet web ose aplikacionet e licencuara për këtë aktivitet. Do të ngrihet edhe një regjistër elektronik, i cili do të ndalojë pjesëmarrjen e personave me varësi ose probleme të tjera me lojërat e fatit.
Ligji për këtë veprimtari është miratuar prej tre vitesh, por nuk ka gjetur zbatim. Gjatë kësaj periudhe, policia njofton pothuajse çdo ditë ndalime për baste sportive të paligjshme.
Eurobondi më i madh ndonjëherë
Në anën e financimit, buxheti do të mbështetet edhe nga eurobondi i tetë, që shënon daljen e tetë të Shqipërisë në tregjet financiare ndërkombëtare në 17 vite. Vlera e tij parashikohet në 62.6 miliardë lekë, rreth 650 milionë euro me kursin aktual të këmbimit, duke e bërë eurobondin më të madh ndonjëherë për vendin.
Huamarrja e huaj do të realizohet përmes disbursimit të shumave që financojnë zbatimin e projekteve. Në total, detyrimi i huaj për vitin 2027 vlerësohet në rreth 118.2 miliardë lekë.
