Tregu i basteve sportive online në Shqipëri vijon të funksionojë jashtë çdo kuadri ligjor, duke sjellë humbje për të gjitha palët: shteti nuk mbledh të ardhurat që i takojnë, bizneset e interesuara mbeten në pritje, ndërsa lojtarët luajnë pa asnjë formë mbrojtjeje. Ndërkohë, policia raporton pothuajse çdo ditë arrestime të personave që vazhdojnë veprimtarinë e paligjshme, një fenomen që shoqërohet me informalitet, mungesë kontrolli dhe rritje të kriminalitetit.

Tre humbës në të njëjtën situatë

Sipas pedagogut dhe ekspertit të ekonomisë, Artur Ribaj, gjendja aktuale nuk i shërben askujt.

“Mendoj se të gjitha palët janë të humbura në këtë situatë. Bizneset që kanë shprehur interes për të hyrë në tregun e licencuar të basteve kanë mbetur pezull, pa një afat të qartë dhe pa mundësi planifikimi. Nga ana tjetër, qytetarët që luajnë po e bëjnë këtë në mënyrë tërësisht informale, pa asnjë mekanizëm mbrojtës, duke rritur rrezikun për abuzime, humbje të mëdha dhe përfshirje në aktivitete të paligjshme. Ndërkohë, edhe shteti është humbësi i tretë, sepse nuk po arrin të grumbullojë taksat dhe të ardhurat që do të vinin nga një treg i rregulluar dhe i monitoruar”

Pasojat negative, si për arkën e shtetit ashtu edhe për ata që luajnë në mënyrë të paligjshme, pritet të thellohen pas vendimit të qeverisë për të rishikuar ligjin, i cili u miratua, por nuk hyri asnjëherë në zbatim.

Bastet ende jo të ligjshme

Ribaj nënvizon se, për sa kohë procesi i licencimit nuk ka përfunduar, aktiviteti nuk mund të konsiderohet i rregullt. “Derisa të plotësohen kriteret e licencimit; derisa të licencohen kompanitë që do të ushtrojnë veprimtarinë e lojërave të fatit... nuk mund të themi se bastet sportive aktualisht janë të ligjshme”, thekson ai.

Ndryshimet ligjore të miratuara 2 vite e gjysmë më parë parashikojnë që qytetarët, për të vënë baste sportive online, të regjistrohen me kartën e identitetit në faqet web ose aplikacionet e licencuara për këtë veprimtari. Gjithashtu, do të ngrihet një regjistër elektronik që do t’u ndalojë lojën personave me varësi ose probleme të tjera me lojërat e fatit.

Varësia u përhap gjatë pesë viteve

Sipas ekspertit, mbyllja e pikave fizike nuk e zgjidhi problemin, përkundrazi e rëndoi atë.

“Situata u bë më e keqe se para se bastet sportive ishin fizike dhe lojtarët duhet të shkonin fizikisht. Në këtë 5-vjeçar teksa pikat e basteve fizike ishin të mbyllura, u shtuan baste online. Nëse më parë ne kishim 5 mijë pika bastesh, gjatë këtyre 5 viteve, numri u barazua me popullsinë. Dikush që kishte varësi e thelloi atë dhe të tjerë të varur u shtuan”

Kështu, në një kohë kur bastet sportive, tashmë vetëm në formën online, pritet të bëhen të ligjshme, numri i lojtarëve të varur nga lojërat e fatit vazhdon të rritet.