Drafti i paketës së re fiskale, që do të përcaktojë mënyrën e taksimit në Shqipëri nga janari i vitit të ardhshëm dhe që u prezantua nga kryeministri Edi Rama, ka shkaktuar prej disa ditësh shqetësim te pothuajse të gjitha kategoritë e bizneseve.
Hotelierët në Vlorë: rrezik për konkurrueshmërinë
Në Vlorë, administratorët e hoteleve vlerësojnë se regjimi i ri i taksimit për sektorin e tyre nuk përputhet me situatën që po përjetojnë aktualisht. Sipas tyre, ndryshimet mund t'i lënë pa mundësi për të konkurruar me vendet e rajonit dhe do të çonin në humbjen e klientëve.
Biznesi i vogël në Durrës kërkon zgjidhje
Edhe bizneset e vogla janë në gatishmëri. Kontabilistët në Durrës raportojnë se po marrin telefonata nga sipërmarrës që nuk e kanë të qartë çfarë do të ndryshojë. Disa prej tyre kërkojnë pezullimin e aktivitetit, ndërsa të tjerë po mendojnë se si të mbeten nën pragun që i detyron të paguajnë TVSH, sinjal i qartë për rritje të informalitetit.
Ndonëse qeveria synon zgjerimin e bazës së tatimpaguesve dhe formalizimin e ekonomisë, reagimet e biznesit paralajmërojnë efektin e kundërt, si dhe rritje të barrës fiskale për bizneset dhe konsumatorët.
