Pragu i regjistrimit në TVSH pritet të ndryshojë për herë të shtatë, pas propozimit të ri për ta ulur pragun e tatueshëm në 5 milionë lekë. Ekspertët fiskalë dhe audituesit ligjorë paralajmërojnë se masa mund të sjellë një valë tjetër rritjeje kostosh për bizneset e vogla.
Mësimi i vitit 2018
Specialistët i referohen eksperimentit të vitit 2018, kur pragu i TVSH-së u ul në 2 milionë lekë. Sipas tyre, ai vendim rriti barrën e kostove për biznesin e vogël, por nuk arriti të frenonte informalitetin, që ishte një nga argumentet kryesore për ndryshimin.
Shqetësimet e ekspertëve
Me propozimin e ri, ekspertët ngrenë shqetësime se historia mund të përsëritet. Ata vlerësojnë se ndryshimet e shpeshta të pragut krijojnë pasiguri për sipërmarrjet e vogla, të cilat do të duhet të përballen sërish me detyrime dhe shpenzime shtesë administrative e fiskale.
Debati vjen në një kohë kur bizneset e vogla po përballen me më shumë taksa dhe më pak nxitje, ndërsa mbetet e hapur pyetja nëse vendi rrezikon të mbetet pas rajonit në konkurrueshmëri fiskale.
