Qeveria shqiptare planifikon të dalë sërish në tregjet financiare ndërkombëtare në vitin 2027 me një Eurobond të ri, vlera e të cilit sipas projektbuxhetit për vitin e ardhshëm parashikohet në 62.6 miliardë lekë. Me kursin aktual të këmbimit, shuma përkthehet në rreth 688 milionë euro, çka do ta bënte këtë emetim më të madhin që Shqipëria ka realizuar ndonjëherë. Bëhet fjalë për daljen e 8-të të vendit në tregjet ndërkombëtare brenda 17 viteve.
Si funksionon Eurobondi
Eurobondi është një obligacion që emetohet jashtë vendit (offshore) nga qeveri ose korporata, në një monedhë të ndryshme nga ajo e vendit emetues, dhe zakonisht përdoret si instrument borxhi afatgjatë. Përmes tij, qeveria siguron akses te investitorët ndërkombëtarë dhe financim shtesë në formë huaje. Në thelb, shteti merr hua një shumë të caktuar nga investitorë të huaj dhe e shlyen atë, së bashku me interesat, në fund të periudhës së maturimit.
Shqipëria emetoi Eurobondin e saj të parë në vitin 2010, me vlerë 300 milionë euro dhe afat maturimi 5-vjeçar, borxh që tashmë është shlyer plotësisht. Dalja më e fundit e vendit në tregjet ndërkombëtare ishte në vitin 2025.
Huamarrja e huaj dhe e brendshme në 2027
Përveç Eurobondit, huamarrja e huaj parashikohet të realizohet përmes disbursimit të huave që financojnë zbatimin e projekteve prioritare të qeverisë, si dhe përmes mbështetjeve buxhetore, procedurat dhe kushtet paraprake të të cilave mund të plotësohen gjatë vitit 2027.
Në total, huamarrja e huaj për vitin 2027 vlerësohet në rreth 118.2 miliardë lekë. Pasi të llogaritet borxhi i huaj që do të ripaguhet gjatë vitit, huamarrja e huaj neto pritet të jetë 22.6 miliardë lekë.
Nga ana tjetër, huamarrja e brendshme për vitin 2027 planifikohet në 48 miliardë lekë. Huaja e re në tregun vendas pritet të sigurohet kryesisht përmes titujve shtetërorë afatgjatë, në përputhje me objektivat për uljen e risqeve, por edhe duke iu përshtatur preferencave të investitorëve për këta tituj.
