Ministri i Financave, Petrit Malaj, njoftoi në Komisionin e Ekonomisë se ulja e TVSH-së për produktet e shportës do të shoqërohet me monitorim të shtuar edhe për produktet ushqimore. Sipas tij, qeveria po shqyrton krijimin e një bordi të përhershëm transparence, si dhe përdorimin e teknologjisë përmes sistemit “Price Watch”, me qëllim ndjekjen e çmimeve që nga importi deri te konsumatori final.
Rritja e TVSH-së standarde nuk e mbulon plotësisht humbjen
Malaj shpjegoi se rritja e normës standarde të TVSH-së synon të kompensojë uljen për produktet e shportës, por nuk arrin ta mbulojë tërësisht atë. Sipas shifrave të paraqitura prej tij, rritja e TVSH-së në 21% sjell 10.6 miliardë lekë në buxhet, ndërsa humbja nga ulja e TVSH-së për ushqimet vlerësohet në 12.8 miliardë lekë.
“Rritja e TVSH-së standarde mundohet të kompensojë uljen e TVSH-së që ne do të bëjmë për produktet e shportës, dhe nuk e mbulon plotësisht”, u shpreh Malaj.
Lidhur me mënyrën e monitorimit, ministri tha se qeveria po punon me mekanizma të caktuar. Ai përmendi ekzistencën e disa mekanizmave për tregjet oligopol, si ai i hidrokarbureve, i cili do të përdoret për të verifikuar reflektimin e uljes së taksës së qarkullimit në çmime.
“Po shohim mundësinë nëse do të ketë edhe bord transparence permanent. Po shohim mundësinë e teknologjisë së informacionit, si Price Watch, për të parë rrugën e çmimit nga importi deri te konsumatori final”, deklaroi ai.
Të ardhurat mbi pritshmëritë
Gjatë diskutimit, Malaj bëri të ditur se të ardhurat nga tatimet dhe doganat janë 8.7% më të larta se ato të pritshme për vitin 2026, ndërsa kontributet e sigurimeve arrijnë në 210.3 miliardë lekë.
Sipas ministrit, ky performancë është ndikuar nga rritja ekonomike, indeksimi, zbatimi i masave fiskale dhe implementimi i strategjisë afatmesme. Për vitin 2026, faktori kryesor ka qenë rritja ekonomike, ndërsa efekti i kursit të këmbimit ka qenë i vogël, në masën 7-10%.
