Forcat e Armatosura do të përfitojnë një pjesë të buxhetit të vitit 2027 për investime në infrastrukturë dhe pajisje ushtarake. Vetëm për repartet e Forcave të Luftimit, që përfshijnë Forcën Tokësore, Forcën Ajrore, Forcën Detare dhe Regjimentin e Operacioneve Speciale, janë parashikuar investime me vlerë 24.5 miliardë lekë.
Forca Ajrore me shpenzimet më të larta
Pjesa më e madhe e fondeve shkon për Forcën Ajrore, e cila ka në plan 18 investime me vlerë totale 9.4 miliardë lekë. Projekti më i kushtueshëm në listën e publikuar për këtë repart është pajisja me bateri të mbrojtjes ajrore me rreze të mesme. Kosto të konsiderueshme do të ketë edhe krijimi i Shkollës së Aviacionit, së bashku me ndërtimin e hangarëve që i shërbejnë asaj.
Në Bazën Ajrore të Kuçovës parashikohet ndërtimi i një qendre kontrolli, riparimesh e mirëmbajtjeje, si dhe i një depoje logjistike. Ndërkaq, në Bazën Ajrore të Farkës do të ngrihet një kullë për kontrollin e trafikut ajror.
Për vitin 2027 është planifikuar blerja e avionëve me krahë fiks shumë rolesh dhe ndërtimi i një sistemi anti-dron C-UAS. Kompletimi me helikopterë UH-60 Black Hawk pritet të realizohet në vitin 2029.
Anije e re për Forcën Detare
Forca Detare do të shtojë në flotën e saj një anije patrulluese luftarake, të pajisur me sistemet e plota luftarake, me një kosto rreth 5.4 miliardë lekë. Në listën e projekteve përfshihen gjithashtu ndërtimi i infrastrukturës për bazën detare të NATO-s në portin e ri të Porto-Romanos, si dhe rikonstruksioni i tunelit të nëndetëseve dhe punime infrastrukturore në Porto Palermo.
Forca Tokësore dhe Operacionet Speciale
Për Forcën Tokësore janë parashikuar rreth 15 investime me vlerë 7.7 miliardë lekë. Nga ana tjetër, Regjimenti i Operacioneve Speciale ka nivelin më të ulët të investimeve mes reparteve të Forcave të Luftimit për vitin 2027.
