Administrata Doganore Shqiptare ka mbledhur rreth 185.9 miliardë lekë të ardhura në periudhën janar-shtator 2026, me një shtesë prej afro 7.2 miliardë lekësh në krahasim me nëntë muajt e parë të vitit 2025.
Të dhënat e bëra publike nga Doganat tregojnë se plani për këtë periudhë është përmbushur në masën 104%. Sipas institucionit, nëntëmujori i parë i 2026 përbën periudhën me performancën më të mirë në historinë e administratës doganore.
Kursi i këmbimit ul të ardhurat me 5.75 miliardë lekë
Rezultati është arritur edhe pse forcimi i lekut ka pasur efekt negativ, duke zbritur nga të ardhurat rreth 5.75 miliardë lekë. Doganat sqarojnë se në hartimin e planit për vitin 2026, dollari amerikan ishte llogaritur me kursin 89.01 lekë, ndërkohë që sot këmbehet me 81.28 lekë, rreth 8.2% më pak se një vit më parë.
Rënie ka pësuar edhe euro, e cila nga 98.11 lekë sa ishte parashikuar në plan, aktualisht kuotohet në 95.43 lekë, me një ulje prej rreth 3.2% krahasuar me një vit më parë.
Sipas vlerësimit të Administratës Doganore, të ardhurat e grumbulluara gjatë nëntë muajve të parë janë rritur me ritme më të shpejta se ekonomia, ndaj kjo periudhë cilësohet si më e mira e regjistruar deri tani.
