Kriza në Lindjen e Mesme ka filluar te japë efekte në shtrenjtimin e kostos së jetesës për shqiptarët.
Në prill, inflacioni, që mat ndryshimin e çmimeve të shportës kryesore te mallrave arriti në 2.8%, nga 2.6% që ishte në mars, muaji i parë pas fillimit të luftës që ndikoi në rritjen e menjëhershme të çmimeve të karburanteve mbi 200 lekë, nga 175 lekë që ishte deri në shkurt.
Ky është niveli më i lartë që nga janari 2024, kur vendi po vuante ende nga efektet e luftës Rusi Ukraine.
Efektin kryesor në rritjen e çmimeve e ka dhënë transporti, i ndjekur nga qiratë.
Në mbledhjen e fundit, Banka e Shqipërisë, e cila është përgjegjëse për ruajtjen e stabilitetit të çmimeve vendosi të mbajë normën bazë, instrumenti përmes të cilin kontrollon ofertën e parasë në treg, në 2.5%.
Guvernatori, Gent Sejko, tha se parashikimet e skenarit bazë sugjerojnë se rritja e çmimeve të naftës dhe të energjisë në tregjet botërore do të shkaktojë një rritje të lehtë dhe të përkohshme të inflacionit mbi objektiv gjatë vitit 2026, si dhe një ngadalësim margjinal të ritmit të rritjes ekonomike në vend. Bazuar në këto premisa, efektet e goditjes pritet të jenë kalimtare edhe të mos lenë gjurmë afatgjata në trendet e zhvillimit të vendit.
Sipas njoftimit të INSTAT norma e inflacionit e matur me Indeksin e Çmimeve të Konsumit (IÇK) në muajin Prill 2026 ishte 2,8 për qind, nga 2,3 për qind në Prill 2025.
Krahasuar me muajin Mars 2026, çmimet e konsumit u rritën me 0,3 për qind. Rritja vjetore e çmimeve në Prill 2026 u ndikua kryesisht nga grupi “Transporti” me 8,5 %, pasuar nga “Qira, ujë, energji elektrike, gaz dhe karburante të tjera” me 4,7%, “Sigurime dhe shërbime financiare” me 4,1%, “Argëtim, sport dhe kulturë” me 3,7%, “Mobilje, pajisje shtëpie dhe mirëmbajtje e shtëpisë” dhe “Restorante dhe shërbime akomodimi“ me 2,8% secili, “Pije alkoolike dhe duhan” dhe “Kujdesi personal dhe mallra e shërbime të ndryshme” me 2,7% secili, “Shërbimi arsimor” me 2,0%, “Ushqime dhe pije joalkoolike” me 1,3%, etj.
Krahasuar me Mars 2026, rritja më e madhe e çmimeve vërehet në grupin “Transporti” me 1,0%, pasuar nga grupet “Argëtim, sport dhe kulturë” me 0,9%, “Kujdesi personal dhe mallra e shërbime të ndryshme” me 0,8%, “Pije alkoolike dhe duhan” me 0,7%, “Restorante dhe shërbime akomodimi“me 0,5%, etj. Nga ana tjetër, çmimet e grupit “Veshje dhe këpucë” u ulën me 0,2%.
Ndikimi i grupeve kryesore në ndryshimin vjetor
Rritja vjetore e çmimeve në muajin Prill është ndikuar kryesisht nga grupi “Qira, ujë, energji elektrike, gaz dhe karburante të tjera” me +0,93 pikë përqindje, pasuar nga grupi “Transporti” me +0,55 pikë përqindje. Gjithashtu, çmimet e grupit “Ushqime dhe pije joalkoolike” me +0,47 pikë përqindje, çmimet e grupit “Mobilje, pajisje shtëpie dhe mirëmbajtje e shtëpisë” me + 0,19 pikë përqindje, çmimet e grupit “Restorante dhe shërbime akomodimi” ndikuan me +0,16 pikë përqindje, çmimet e grupit “Pije alkoolike dhe duhan” me +0,13 pikë përqindje, çmimet e grupit “Kujdesi personal dhe mallra e shërbime të ndryshme” me +0,12 pikë përqindje, çmimet e grupeve “Argëtim, sport dhe kulturë” dhe “Shërbimi arsimor” me +0,07 pikë përqindje secili, çmimet e grupit “Sigurime dhe shërbime financiare” me +0,06 pikë përqindje, çmimet e grupit “Shëndeti” me +0,03 pikë përqindje dhe çmimet e grupit “Informacioni dhe komunikimi” me +0,02 pikë përqindje.
Burimi: Banka e Shqipërisë
Postimi ” Fillojnë të ndihen pasojat e luftës, inflacioni kërcen në 2.8%, niveli më i lartë në dy vjet ” eshte marre nga Revista Monitor.
