Me një ofertë prej 361 mln lekë, Fondi Shqiptar i Zhvillimit ka shpallur kompaninë fituese që do kryejë ndërhyrje në disa akse rrugore që lidhin zona turistike dhe kanë potenciale për zhvillimin e ekonomisë. Tenderi u shpall në fillim të muajit korrik, ndërsa në afatin 3-javor për dorëzimin e ofertave në garë morën pjesë 24 kompani. Gjithsesi, 19 prej tyre u skualifikuan për mospërmbushje të kritereve, ndërkohë që nga 5 operatorët e kualifikuar fituese u shpall kompania ANK, që kishte vlerën më të ulët.
Tenderi i FSHZH u hap pasi ky i fundit i bëri thirrje Njësive të Qeverisjes Vendore për evidentimin në terren dhe projektimin e disa prej akseve rrugore, të cilat janë më problematikë për qarkullimin e automjeteve. Ndërkaq, sipas dokumenteve gjatë hapjes së garës, verifikimi në terren do të bëhet kryesisht për akset rrugore, të cilat lidhin zona turistike dhe që kanë potencial për zhvillimin e ekonomisë, segmente rrugore në zona urbane, në përputhje dhe komplementare me programet e zhvillimit lokal dhe rajonal.
Ndërkohë që, pas këtij verifikimi do të përzgjidhen segmente që paraqesin dëmtime të shtresave rrugore, gjendje teknike jashtë standartit, ku lëvizja e automjeteve bëhet me vështirësi si dhe konsiderohen akse me prioritet ngabashkitë për t’u rehabilituar. Sipas Fondit Shqiptar të Zhvillimit, zbatimi i këtyre projekteve ka si qëllim të përmirësoje qarkullimin e automjeteve dhe njerëzve, si dhe të rrisë sigurinë e lëvizjes.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
