FSHZH shpall tenderin për rrugën lidhëse Osum-Bypass në Berat, fondi limit rreth 273 milionë lekë

Fondi Shqiptar i Zhvillimit (FSHZH) ka nisur procedurën e tenderit për ndërtimin e një rruge të re lidhëse në Berat, që do të bashkojë shëtitoren Osum me Bypass-in e qytetit. Projekti, me një fond limit prej rreth 273 milionë lekësh, ka për qëllim përmirësimin e aksesit, të lidhjeve dhe të lëvizshmërisë rajonale e lokale.

Nga dokumentacioni i publikuar në Agjencinë e Prokurimit Publik rezulton se investimi synon të lehtësojë qarkullimin e automjeteve dhe të pakësojë ngarkesën e trafikut në rrugën "Santa Lucia".

Gjurma e aksit të ri

Rruga e re do të fillojë pranë Hotel Tomorit dhe do të shtrihet deri te hyrja e Bypass-it të ri, në fundin e rrugës "Santa Lucia". Përmes saj synohet të largohet një pjesë e automjeteve nga rruga ekzistuese, përgjatë së cilës gjenden banesa dhe shkolla, duke rritur kështu sigurinë si për shoferët, ashtu edhe për këmbësorët.

Projekti e ndan aksin në dy zona:

• Segmenti i parë, rreth 375 metra i gjatë, kalon drejtpërdrejt mbi shtratin e lumit Osum.
• Segmenti i dytë, me gjatësi rreth 700 metra dhe gjerësi afërsisht 12 metra, ku janë realizuar edhe mbrojtje me gabione për të parandaluar vërshimet e lumit.

Përveç kësaj, parashikohen masa për mbrojtjen e brigjeve të Osumit pothuajse përgjatë gjithë gjatësisë së rrugës. Në të dyja anët e aksit do të vendosen gjelbërim dhe ndriçim, ndërsa ndriçim është parashikuar edhe në anën pranë lumit.

Dy rrethrrotullime të reja

Në pikat ku rruga lidhet me rrjetin ekzistues do të ndërtohen dy rrethrrotullime. I pari do të vendoset pranë Bibliotekës së qytetit, ndërsa i dyti në fund të aksit të ri, në kryqëzimin me rrugën "Santa Lucia". Qëllimi i tyre është një organizim më i mirë i lëvizjes së mjeteve dhe lidhje më të thjeshta me rrugët ekzistuese e lagjet përreth.

Projekti përfshin gjithashtu trajtimin e rrjeteve të infrastrukturës, si dhe procedurat e nevojshme për shpronësimet.

Sipas dokumentit të Agjencisë së Prokurimit Publik, me realizimin e kësaj vepre synohet krijimi i një alternative të re për qarkullimin në Berat, duke shmangur kalimin e një pjese të automjeteve nëpër zonat e banuara dhe duke përmirësuar lidhjen mes shëtitores Osumi dhe Bypass-it të qytetit.