Fondi Shqiptar i Zhvillimit ka shpallur garën për projektimin dhe zbatimin e punimeve që synojnë rikonstruksionin e unazave urbane në Ballsh, Fushë Krujë dhe Elbasan. Ky investim, i cili mbështetet në një fond limit të parashikuar prej 681 milionë e 628 mijë lekësh, ka si qëllim kryesor përmirësimin e konektivitetit rajonal dhe të infrastrukturës urbane në këto zona.
Sipas dokumentit të publikuar në Agjencinë e Prokurimit Publik, ndërhyrja përfshin rehabilitimin e rreth 12.3 kilometrave rrugë gjithsej. Synimet e projektit lidhen ngushtë me ngritjen e standardeve të infrastrukturës rrugore, rritjen e sigurisë, përmirësimin e aksesueshmërisë dhe forcimin e lidhjeve me korridoret kombëtare.
Në Bashkinë Mallakastër, ndërhyrjet do të shtrihen në segmentin Varrezat–Agjencia, në hyrjen veriore të Ballshit, që shërben për lidhjen e qytetit me zonat përreth dhe drejtimin Patos–Fier. Ndërkaq, në Fushë Krujë, plani parashikon ndërhyrje në dy segmente të unazës, duke përfshirë aksin në zonën e Luzit që lidh zonën industriale me korridorin kryesor rrugor. Ky segment përdoret shpesh nga mjete të rënda transporti, ndërsa amortizimi dhe mungesa e sigurisë pengojnë lëvizjen e përditshme të banorëve dhe bizneseve.
Në qytetin e Elbasanit, projekti përfshin segmentin Bradashesh–Rrethrrotullimi i Luleve dhe një pjesë të unazës urbane. Këto akse janë kyçe për përballimin e ngarkesës së trafikut nga Tirana, Durrësi dhe zona industriale, si dhe për qarkullimin drejt nyjave të tjera të transportit rajonal.
Dokumentacioni zyrtar vë inxhinierët përballë problematikave të theksuara, si dëmtimi i shtresave asfaltike, mungesa e kanalizimeve, trotuaret e dëmtuara apo që mungojnë, ndriçimi i dobët dhe sinjalistika e amortizuar. Projekti do të trajtojë nevojat e secilit segment përmes rikonstruksionit të rrugëve, riorganizimit të kryqëzimeve, vendosjes së sinjalistikës dhe ndriçimit të ri, si dhe krijimit të hapësirave të sigurta për këmbësorët dhe çiklistët.
