Sistemi elektroenergjetik shqiptar është pasuruar me rreth 138 MW kapacitete të reja diellore gjatë gjashtëmujorit të parë të vitit 2026. Sipas të dhënave zyrtare të publikuara nga Enti Rregullator i Energjisë, deri në fund të muajit qershor kanë hyrë zyrtarisht në prodhim tetë centrale të reja fotovoltaike, të cilat janë lidhur me rrjetin e transmetimit dhe atë të shpërndarjes.
Peshën kryesore të prodhimit e mbajnë dy impiante të mëdha të lidhura drejtpërdrejt me rrjetin e transmetimit, me një kapacitet të përbashkët prej 125 MW. Centrali i njohur si GreeNat Solar Park Ballsh disponon një fuqi të instaluar prej 100 MW, ndërsa subjekti Power Energy kontribuon me 25 MW kapacitete të reja. Që nga momenti i fillimit të prodhimit dhe deri në mbyllje të muajit qershor, këto dy impiante kanë gjeneruar gjithsej rreth 56,314 MWh energji elektrike. Kontributin më të lartë e ka dhënë parku diellor i Ballshit me 49,702 MWh, kurse prodhimi i regjistruar nga Power Energy arrin në 6,612 MWh.
Nga ana tjetër, në rrjetin e shpërndarjes janë integruar gjashtë centrale të reja fotovoltaike, me një kapacitet të përgjithshëm prej 13 MW. Pesë prej tyre, të administruara nga shoqëritë ORHER, RENEW, GREEN PLUS ENERGY, DION Energji dhe GREEN ENERGY, kanë secila një fuqi të instaluar prej 2 MW. Këtij grupi i shtohet edhe centrali i shoqërisë DESLA, me një kapacitet prej 3 MW, i cili operon në tregun e lirë. Në total, shtatë centralet e reja kanë arritur të prodhojnë rreth 64,350 MWh energji elektrike deri në përfundim të gjashtëmujorit të parë. Me funksionalizimin e këtyre impianteve, kapaciteti total i instaluar fotovoltaik në vend ka arritur në kuotën e 667.93 MW.
