Shoqëria Rajonale e Ujësjellës-Kanalizimeve Shkodër ka nisur procedurat për të prodhuar vetë energji elektrike nga dielli, duke hapur një tender me fond limit prej 122.6 milionë lekësh, pa TVSH. Qëllimi i investimit është rritja e eficiencës energjetike dhe ulja e kostove që shoqëria përballon për furnizimin me energji.
Tenderi parashikon instalimin e impianteve fotovoltaike, si dhe kryerjen e punimeve shoqëruese të nevojshme për vënien e tyre në funksion.
Dy impiante me kapacitete të ndryshme
Dokumentacioni teknik përfshin dy impiante, një në Dobraç dhe një në Trush, të cilat do të mbështesin me energji diellore funksionimin e infrastrukturës së ujësjellësit. Për Dobraçin, raporti teknik parashikon një fuqi prej 1 megavat, ndërsa për Trushin kapaciteti i projektuar është 305 kilovat.
Sipas raporteve teknike, dy impiantet së bashku mund të prodhojnë rreth 1.84 milionë kilovatorë energji elektrike në vit. Kjo energji do të shkojë për nevojat e objekteve të ujësjellësit, ndërsa sasia e tepërt parashikohet të derdhet në rrjetin elektrik. Impiantet do të vendosen në terren të hapur dhe kanë një jetëgjatësi të planifikuar prej 25 vjetësh.
Financimi dhe afatet
Projekti do të financohet nga buxheti i shtetit, me fonde të parashikuara për periudhën 2027–2029. Punimet duhet të përfundojnë brenda 12 muajve, ndërsa kompanitë e interesuara kanë kohë të dorëzojnë ofertat deri më 30 tetor.
Pikëpyetjet në dokumentacion
Dokumentet teknike shfaqin megjithatë disa mospërputhje në kapacitetet e projektuara, sidomos për impiantin e Dobraçit, ku simulimi energjetik është kryer për një kapacitet më të ulët se ai që përmendet në raportin teknik.
Leverdia ekonomike e investimit do të varet nga sa energji do të konsumojë drejtpërdrejt ujësjellësi dhe nga sa do të ulen faturat e energjisë elektrike. Dokumentet e shqyrtuara nuk japin një vlerë përfundimtare për kursimin vjetor.
