Drejtoria Rajonale e OSSH Korçë ka nisur procedurën e prokurimit për rikonstruksionin e rrjetit të tensionit të ulët në nënstacionin Gjanç, në Korçë. Fondi limit i garës është 41 milionë e 396 mijë lekë.
Rrjet i amortizuar dhe i pamjaftueshëm
Dokumentacioni i publikuar në Agjencinë e Prokurimit Publik tregon se rrjeti aktual elektrik është i amortizuar dhe nuk mbulon më nevojat e zonës. Përcjellësit e vjetër të linjave të tensionit të ulët shkaktojnë rënie të tensionit dhe ulin cilësinë e furnizimit me energji elektrike.
Probleme ka edhe infrastruktura mbështetëse. Një pjesë e shtyllave prej betoni janë të dëmtuara, ato prej druri janë të kalbura, ndërsa traversat dhe izolatorët kanë dëmtime.
Sipas dokumenteve teknike, rrjeti është ndërtuar në një kohë kur kërkesa për energji elektrike ishte më e ulët. Rritja e konsumit në vitet e fundit e ka bërë të domosdoshme ndërhyrjen për të përmirësuar kapacitetet e furnizimit.
Çfarë përfshin projekti
Rikonstruksioni do të shtrihet edhe në fshatin Dvoran dhe në kabinën Kamenica 3. Qëllimi është përmirësimi i nivelit të tensionit, ulja e defekteve dhe e ndërprerjeve, si dhe rritja e sigurisë për banorët. Njëkohësisht, projekti synon të parandalojë lidhjet e paligjshme në rrjet.
Vlerësimi teknik nënvizon se linjat me përcjellës të zhveshur që kalojnë pranë banesave, e në disa raste edhe brenda hapësirave të tyre, përbëjnë rrezik për sigurinë e banorëve dhe hapin rrugë për furnizim me energji jashtë sistemit të matjes.
Objektivat e OSSH
Me këtë investim, OSSH synon të rrisë cilësinë dhe vazhdimësinë e furnizimit me energji elektrike, të ulë numrin e defekteve dhe të zgjerojë kapacitetin e rrjetit për të përballuar kërkesën në rritje. Po ashtu, synohet përmirësimi i treguesve të cilësisë së furnizimit dhe krijimi i kushteve më të sigurta për punonjësit që mirëmbajnë rrjetin elektrik.
